बाढ़ि प्रभावित क्षेत्रसभक सीएम सम्राट द्वारा हवाई सर्वेक्षण, फरक्का बराजक सभ गेट खुजल
पटना । समदिया
बिहारमे गंगा नदीक बढ़ैत जलस्तर आ बाढ़िक गंभीर स्थितिक बीच मुख्यमंत्री सम्राट चौधरी बाढ़ि प्रभावित आ संवेदनशील क्षेत्रसभक हवाई सर्वेक्षण कऽ स्थितिक जायजा लेलनि। मुख्यमंत्री नवगछिया, राघोपुर दियारा, कोसी-गंगा संगम क्षेत्र, बेगूसराय आ बख्तियारपुर सहित विभिन्न प्रभावित क्षेत्रक हवाई निरीक्षण कएलनि।
हवाई सर्वेक्षणक दौरान मुख्यमंत्री गंगा नदी आ ओकर सहायक नदीसभक जलस्तर, दियारा आ निचला क्षेत्रसभमे उत्पन्न स्थितिक संगहि प्रभावित इलाकासभमे चलि रहल राहत आ बचाव कार्यक समीक्षा कएलनि। हुनका द्वारा संबंधित अधिकारीसभकेँ बाढ़िक स्थितिपर लगातार नजरि राखबाक आ संवेदनशील क्षेत्रसभमे प्रशासनकेँ पूर्ण रूपसँ सतर्क रहबाक निर्देश देल गेल।
मुख्यमंत्री कहलनि जे प्रभावित लोकसभ धरि समयपर भोजन, पेयजल, राहत सामग्री आ आन आवश्यक सुविधासभ पहुँचेनाइ सुनिश्चित कएल जाए। कोनो आपात स्थितिमे लोकसभकेँ सुरक्षित स्थानपर पहुँचाबय लेल सभ आवश्यक तैयारी पूर्ण रूपसँ तैयार राखल जाए।
हवाई सर्वेक्षणक बाद मुख्यमंत्री भागलपुर एयरपोर्टपर उच्च अधिकारीसभक संग समीक्षा बैठक कएलनि। बैठकमे बाढ़िक स्थिति, नदीसभक जलस्तर, राहत आ बचाव कार्य तथा प्रभावित क्षेत्रसभमे प्रशासनिक तैयारीक विस्तृत समीक्षा कएल गेल। अधिकारीसभ मुख्यमंत्रीकेँ जानकारी देलनि जे जलक दबाव तेजीसँ कम भऽ रहल अछि आ बहुत जल्द स्थितिमे सुधारक संभावना अछि।
अधिकारीसभ ईहो जानकारी देलनि जे मुख्यमंत्रीक पहल आ पश्चिम बंगालक मुख्यमंत्रीसँ भेल वार्ताक बाद फरक्का बराजक सभटा गेट खोलि देल गेल अछि। एकर बाद गंगामे जलक दबाव कम होयबाक संभावना अछि।
मुख्यमंत्री सम्राट चौधरी कहलनि जे बाढ़ि प्रभावित लोकसभक सुरक्षा राज्य सरकारक सर्वोच्च प्राथमिकता अछि। राहत आ बचाव कार्यमे कोनो प्रकारक कमी नहि रहबाक चाही। हुनका द्वारा जिला प्रशासन आ संबंधित विभागसभकेँ आपसी समन्वयक संग काज करबाक आ जलस्तर तथा बाढ़िक स्थितिमे होबयवला प्रत्येक बदलावपर लगातार नजरि राखबाक निर्देश देल गेल।
मुख्यमंत्री संवेदनशील क्षेत्रसभमे अविलंब मरम्मति काज कराबय आ लगातार निगरानी रखबाक निर्देश सेहो देलनि। हुनकर कहब छलनि जे जल संसाधन विभाग पूर्ण रूपसँ मुस्तैद रहए आ स्थितिक लगातार मॉनिटरिंग करैत रहए। बाढ़ि प्रभावित लोकसभकेँ निर्धारित एसओपीक अनुसार हरसंभव सहायता उपलब्ध कराओल जाए आ राहत-बचाव कार्य पूर्ण मुस्तैदी आ संवेदनशीलताक संग चलाओल जाए।
हवाई सर्वेक्षणक अवसरपर उपमुख्यमंत्री विजय कुमार चौधरी, ऊर्जा मंत्री शैलेश कुमार उर्फ बुलो मंडल, मुख्यमंत्रीक प्रधान सचिव दीपक कुमार, मुख्य सचिव प्रत्यय अमृत, पुलिस महानिदेशक विनय कुमार, अभियानक विशेष अधिकारी कुंदन कृष्णन, जल संसाधन विभागक सचिव डॉ. चन्द्रशेखर सिंह, भागलपुर प्रमंडलक आयुक्त प्रेम सिंह मीणा, भागलपुर प्रक्षेत्रक पुलिस महानिरीक्षक विवेक कुमार, भागलपुरक जिलाधिकारी अलंकृता पाण्डेय, वरीय पुलिस अधीक्षक प्रमोद कुमार यादव सहित अन्य वरीय अधिकारी उपस्थित छलाह।
