छात्रसभक प्रदर्शन पर BPSC अधिकारीक विवादित बयान वायरल, मुख्यमंत्री सम्राट चौधरी देलनि निलंबनक निर्देश
पटना । समदिया
बिहारमे छात्रसभक प्रदर्शनकेँ लऽ कऽ विवादित बयान देनिहार बिहार लोक सेवा आयोग (BPSC) केर परीक्षा नियंत्रक राजेश कुमार पर सरकार सख्त कार्रवाई कयलक अछि। मुख्यमंत्री सम्राट चौधरी वायरल वीडियो पर संज्ञान लैत संबंधित अधिकारीकेँ निलंबित करबाक निर्देश देलनि अछि।
मुख्यमंत्री सामान्य प्रशासन विभागकेँ निर्देश देलनि अछि जे परीक्षा नियंत्रक राजेश कुमारकेँ निलंबित कएल जाए। छात्रसभक प्रदर्शनक संबंधमे हुनकर विवादित टिप्पणी सोशल मीडियापर वायरल भेल छल, जाहिपर व्यापक प्रतिक्रिया देखल गेल।
दरअसल, गर्दनीबागमे छात्रसभक प्रदर्शनकेँ लऽ कऽ पत्रकारसभक प्रश्नक उत्तर दैत BPSC केर परीक्षा नियंत्रक राजेश कुमार विवादित कहावतक प्रयोग कएने छलाह। प्रेस कॉन्फ्रेंसमे ओ कहलनि, “हाथी चले बाजार, कुत्ते भौंके हजार।” हुनकर एहि टिप्पणीकेँ छात्रसभ आ विभिन्न लोक अनुचित आ आपत्तिजनक मानलक।
मामिला तूल पकड़लाक बाद राजेश कुमार अपन बयान पर खेद प्रकट केलनि। ओ कहलनि जे ओ केवल एकटा लोकोक्तिक प्रयोग कएने छलाह, मुदा ओकरा तोड़ि-मरोड़ि कऽ प्रस्तुत कएल जा रहल अछि। हुनकर कहब छलनि जे कोनो व्यक्ति अथवा समूहक भावनाकेँ ठेस पहुँचेबाक हुनकर कोनो मंशा नहि छल। यदि हुनकर बयानसँ ककरो भावना आहत भेल अछि तँ ओ एकरा लेल खेद व्यक्त करैत छथि।
एहि घटनाक्रमक बाद मुख्यमंत्री सम्राट चौधरीक निलंबन संबंधी निर्देशकेँ सरकारक त्वरित कार्रवाईक रूपमे देखल जा रहल अछि।
