फ्लैश फ्लडक खतराक कारण राज्यमे अलर्ट, मुख्यमंत्रीक आपात बैठक, NDRF आ SDRFक तैनाती
पटना । समदिया
नेपालक गंडक नदीक ऊपरी जलग्रहण क्षेत्रमे फ्लैश फ्लडक आशंका आ गंडक नदीमे अचानक जलप्रवाह बढ़बाक संभावना देखैत बिहार सरकार विशेष सतर्कता जारी कयने अछि। सूचना अनुसार गंडक नदीमे करीब तीन मीटर ऊँच फ्लैश फ्लड वेव आबि सकैत अछि। एहि संभावित संकटक सामना लेल मुख्यमंत्री सम्राट चौधरी आपातकालीन उच्चस्तरीय बैठक कऽ संबंधित जिलाक प्रशासनकेँ पूर्ण रूपेँ अलर्ट मोडमे रहबाक निर्देश देलनि अछि।
मुख्यमंत्री अपन लोक सेवक आवास स्थित ‘संकल्प’ सभागारमे बाढ़िक संभावित स्थितिक समीक्षा कएलनि। ओ कहलनि जे नेपालमे बनि रहल बाढ़िक स्थितिपर लगातार नजरि राखल जाए आ बिहारक संभावित प्रभावित क्षेत्रमे आवश्यक तैयारी पूर्ण राखल जाए।
मुख्यमंत्री विशेष रूपसँ गंडक नदीसँ जुड़ल पश्चिम चंपारण, पूर्वी चंपारण, गोपालगंज, सारण, मुजफ्फरपुर आ वैशाली सहित आन संवेदनशील जिलाक प्रशासनकेँ पूर्ण सतर्क रहबाक निर्देश देलनि। सीतामढ़ी, शिवहर सहित अन्य संभावित प्रभावित क्षेत्रपर सेहो लगातार निगरानी राखल जा रहल अछि।
तटबंधक रातियो होएत विशेष निगरानी
मुख्यमंत्री कमजोर तटबंधक हिस्सा पर तत्काल आवश्यक कार्रवाई करबाक निर्देश देलनि अछि। संगहि बांध आ तटबंधपर रातियोक समय विशेष नाइट पेट्रोलिंग करबाक निर्देश देल गेल अछि। स्थानीय प्रशासनकेँ लाउडस्पीकर आ माइकक माध्यमसँ जनताकेँ संभावित खतरा आ जरूरी सूचनासँ लगातार अवगत करबऽ लेल कहल गेल अछि, जाहिसँ आवश्यकता पड़ला पर लोकसभकेँ समय रहिते सुरक्षित स्थानपर पहुँचाओल जा सकय।
नेपालक रसुवा, नुवाकोट, धादिंग, गोरखा, लमजुंग आ तनहुँ जिलामे फ्लैश फ्लडक उच्च जोखिमक पूर्वानुमान कएल गेल अछि। ई सभ गंडक जलग्रहण क्षेत्रसँ जुड़ल अछि। एकर अतिरिक्त दोलखा आ सिंधुपालचोक जिलामे सेहो फ्लैश फ्लडक उच्च जोखिम बताओल गेल अछि, जे कोसी जलग्रहण क्षेत्रमे पड़ैत अछि।
गंडक बैराज आ नहरक संचालनक निर्देश
जल संसाधन विभाग गंडक बैराजक सभ गेट आ संबंधित नहरमे पानीक सुरक्षित आ प्रभावी प्रबंधन सुनिश्चित करबाक लेल जरूरी निर्देश जारी कयने अछि। संबंधित अभियंता आ पदाधिकारीकेँ अपन-अपन क्षेत्रमे लगातार निगरानी राखबाक तथा तटबंध आ जल संसाधनसँ जुड़ल संरचनाक नियमित निरीक्षण करबाक निर्देश देल गेल अछि।
सभ जिलाधिकारीकेँ नदीक जलस्तर, तटबंध, नीचाँ इलाका, पुल-पुलिया आ अन्य संवेदनशील स्थानक लगातार निगरानी करबाक तथा स्थानीय समुदायकेँ समयपर चेतावनी देबाक निर्देश अछि।
NDRF आ SDRFक अग्रिम तैनाती
संभावित बाढ़िक स्थितिसँ निपटबाक लेल NDRF आ SDRFक अतिरिक्त संसाधनक अग्रिम तैनाती कएल जा रहल अछि। गोपालगंजमे एकटा NDRF टीम पठेबाक निर्देश देल गेल अछि, जखनिकि मुजफ्फरपुरमे एकटा NDRF टीमकेँ स्टैंडबाय राखल जाएत।
बेतियामे सेहो NDRF टीमक शीघ्र तैनातीक तैयारी चलि रहल अछि। आवश्यकता पड़ला पर SSB दिसिसँ QRT आ अन्य जरूरी सहायता उपलब्ध करबाओल जाएत।
निकासी योजना, नाव, आश्रयस्थल आ सामुदायिक रसोईक तैयारी
सभ संबंधित जिलाधिकारीकेँ संभावित प्रभावित लोकसभक लेल निकासी योजना, पर्याप्त नाव, सामुदायिक रसोई आ आश्रयस्थलक व्यवस्था पहिनेसँ सुनिश्चित करबाक निर्देश देल गेल अछि। प्रशासनकेँ आवश्यकता पड़ला पर लोकसभकेँ सुरक्षित स्थानपर पहुँचाबऽ लेल पूर्ण तैयारीमे रहबाक निर्देश अछि।
राज्य सरकार जनतासँ अपील केने अछि जे घबराउ नहि, मुदा सतर्क आ तैयार रहू। प्रशासन पूर्ण रूपेँ अलर्ट अछि आ बचाव तथा राहत दलसभकेँ अग्रिम रूपसँ तैयार राखल जा रहल अछि। नागरिकसभसँ प्रशासनक आधिकारिक सूचना आ निर्देशक पालन करबाक आ अफवाहसँ दूर रहबाक अपील कएल गेल अछि।
अफवाह रोकबाक लेल नियमित मीडिया ब्रीफिंग
सभ जिलाधिकारीकेँ प्रतिदिन मीडिया ब्रीफिंग करबाक आ सोशल मीडियापर लगातार निगरानी राखबाक निर्देश देल गेल अछि, जाहिसँ भ्रामक सूचना आ अफवाहक प्रसार रोकल जा सकय। नागरिकसभसँ सेहो केवल आधिकारिक आ विश्वसनीय स्रोतसँ प्राप्त सूचनापर भरोसा करबाक अपील कएल गेल अछि।
राज्य सरकारक अनुसार, बाढ़िक संभावित चुनौतीसँ निपटबाक लेल प्रशासनिक, राहत आ बचावक सभ तैयारी तेज कऽ देल गेल अछि।
