पुरातात्त्विक धरोहर संरक्षक शतवर्षीय पं जयनंदन मिश्रक निधनसँ धरोहर प्रेमीजन मर्माहत

पटना । समदिया

नवादा जिलाक संस्थापक जिलाधिकारी नरेंद्र पाल सिंह कहने छलाह कि सौभाग्यवश ईश्वर संग्रहालयक लेल एकटा समर्पित कार्यकर्ता जयनंदन मिश्रकें हमरा लग भेज देलैन्ह। हुनकहि समर्पणसँ नवादा संग्रहालयक स्थापना भेल आओर संग्रहालयक लेल संकलित पुरावशेष सभकें सुव्यवस्थित कएल जा सकल। पटना म्यूजियम भवन जकाँ नवादा संग्रहालय भवन निर्माणक लेल स्केच सेहो हुनकहि द्वारा तैयार कएल गेल छल।

इंटैक बिहार चैप्टर द्वारा धरोहर संरक्षक पं जयनंदन मिश्र केर निधन पर आयोजित शोक सभामे चैप्टर कन्वेनर भैरव लाल दास श्रद्धांजलि दैत कहलन्हि कि बिहारक विरासतकें जाहि महापुरुष सभक द्वारा संरक्षित कएल गेल अछि ताहिमे पंडित जयनंदन मिश्रक नाम प्रमुखता सs लेल जा सकैत अछि। चैप्टर केर को- कन्वेनर एवं नारद संग्रहालय, नवादा केर पूर्व प्रभारी डॉ. शिव कुमार मिश्र बतौलन्हि कि सय सालक उम्रमे पंडित जीक निधन हुनक पैतृक गांव मैस्कौर थानांतर्गत मेढकुरीमे शुक्रदिन भs गेलन्हि। पंडित जयनंदन मिश्र द्वारा नरेंद्र पाल सिंहक निर्देश पर नवादा एवं गया जिला सs पुरावशेष संगृहीत कएल गेल छल आओर ओकर समुचित रखरखाव, संरक्षण-संवर्धन एवं सूचीकरण कएल गेल छल। पुरातात्विक महत्वक सामग्री सभकें समुचित ढंग सs प्रदर्शित सेहो कएल गेल छल। तत्कालीन जिलाधिकारी नरेंद्र पाल सिंह द्वारा पंडित मिश्र केर क्रियाकलापक भूरि-भूरि प्रशंसा कएल गेल छल। हुनके सहयोग सs आम जनता एवं पदाधिकारी लोकन्हि सभसँ चंदा लs कs संग्रहालय भवनक निर्माण कराओल गेल छल जे अखनहुँ  मजबूतीसँ ठाढ़ अछि।

संग्रहालय बिहारक पूर्व निदेशक डॉ. उमेश चन्द्र द्विवेदी बतौलन्हि कि पंडित मिश्रकें पुरातात्विक सामग्री सभक विषयमे काफी जानकारी छलन्हि आओर हुनका संस्कृत साहित्य एवं हिन्दी भाषाक सेहो नीक ज्ञान छल। हुनका द्वारा अनेक पोथीक रचना सेहो कएल गेल अछि।