ग्लोबल टेंडरक बदला सरकारक निर्णय, आब 50 करोड़ धरि छोट-छोट निविदा

पटना । समदिया

100

बिहारमे ग्रामीण सड़क आ पुलक निर्माण लेल आब ग्लोबल पैकेजक बदला छोट-छोट टेंडर निकालल जाएत। ग्रामीण कार्य विभाग 237 पुल आ करीब 1360 सड़कक लेल नवासँ अलग-अलग पैकेजमे निविदा जारी करत। विभागीय मंत्री सुनील कुमारक अनुसार पहिने निकालल गेल सभ टेंडर रद्द कऽ देल गेल अछि। बरसात समाप्त भेलाक बाद अक्टूबरसँ नव निविदा प्रक्रिया शुरू हेबाक संभावना अछि।

छोट ठेकेदारक हितमे फैसला

चुनावसँ पहिने ग्रामीण कार्य विभाग एक्के बेरमे हजारों करोड़क योजनाक पैकेज बनाकऽ निविदा आमंत्रित कएने छल। एहि निविदाकेँ विपक्ष आ सत्तापक्षक किछु विधायक सेहो विरोध कएने छलाह। हुनकर तर्क छल जे पैघ पैकेजसँ छोट ठेकेदार सभकेँ काम भेटब कठिन भऽ जाएत।

तत्कालीन ग्रामीण कार्य मंत्री अशोक चौधरी स्पष्ट कएने छलाह जे ई अंतरराष्ट्रीय ग्लोबल टेंडर नहि, बल्कि नेशनल बिडिंग छल। विभिन्न योजनाकेँ एकसाथ पैकेजमे शामिल कऽ निविदा निकालल गेल छल।

50 करोड़ धरि होयत नव पैकेज

आब सरकार योजनाकेँ छोट-छोट पैकेजमे बाँटि कऽ निविदा निकालत। विभागक अनुसार 50 करोड़ टका धरिक योजनाक अलग-अलग टेंडर होयत। एहिसँ स्थानीय आ छोट ठेकेदारकेँ सेहो काजक अवसर भेटबाक उम्मीद अछि।

मंत्री सुनील कुमार कहलनि जे पूर्व मुख्यमंत्री नीतीश कुमार द्वारा शिलान्यास कएल गेल योजनासभ पूरा कएल जाएत। बरसातक बाद अक्टूबरसँ एकर प्रक्रिया जमीन पर देखाइ पड़त।

21 हजार करोड़सँ बेसीक योजनाक शिलान्यास

17 जुलाई 2025 केँ तत्कालीन मुख्यमंत्री नीतीश कुमार ग्रामीण कार्य विभागक 21,406.36 करोड़ टकाक लागतसँ 11,346 पथ आ 730 पुलक कार्यारंभ आ शिलान्यास कएने छलाह। आब एहि योजनामे सँ कतेकक टेंडर रद्द भेल अछि, तकर स्पष्ट जानकारी विभाग दिसिसँ नहि देल गेल अछि। मुदा सरकारक कहब अछि जे शिलान्यास भेल योजनासभक निर्माण कएल जाएत।

सरकार कहलक-खजाना खाली नहि

टेंडर रद्द भेलाक बाद विपक्ष आरोप लगा रहल अछि जे सरकारक खजाना खाली अछि, एहि कारण नव निविदा नहि निकलि रहल अछि। मुदा बीजेपी प्रवक्ता प्रो. अजफर शमशी एहि आरोपकेँ खारिज कएलनि। हुनकर कहब अछि जे फैसला छोट ठेकेदारक हित आ विधायकसभक मांगकेँ ध्यानमे राखि लेल गेल अछि।

ठेकेदार सभ सेहो इंतजारमे

नव टेंडर जारी नहि भेलाक कारण ठेकेदार सभक परेशानी बढ़ल अछि। पटना जिलाक ठेकेदार सत्येंद्र यादव कहलनि जे सरकारक फैसला छोट ठेकेदारक लेल सही अछि, मुदा काजक अभावमे मुश्किल बढ़ि रहल अछि। हुनकर मांग अछि जे सरकार जल्दसँ जल्द नव निविदा जारी करय।

बिहारमे ग्रामीण सड़कक पैघ नेटवर्क

बिहारमे करीब तीन लाख किलोमीटर सड़क अछि। एहिमे एक लाख बीस हजार किलोमीटरसँ बेसी ग्रामीण सड़क अछि। सरकार ग्रामीण सड़कक चौड़ीकरण, मरम्मति आ नव सड़क-पुल निर्माण पर सेहो जोर दऽ रहल अछि। करीब 25 हजार करोड़ टकाक लागतसँ सड़क मरम्मतिक योजना पर सेहो काज प्रस्तावित अछि।

मानसूनक बाद संसाधनक उपलब्धताक आधार पर ग्रामीण कार्य विभाग नव निविदा निकालबाक तैयारीमे अछि। आब पैघ पैकेजक बदला करीब 50 करोड़ धरि छोट-छोट टेंडर निकालि स्थानीय ठेकेदारकेँ काज देबाक सरकारक रणनीति अछि।