आयरलैंडक विरुद्ध विमेंस इंडिया टीमक रिकॉर्ड ४३५ रन, विजयी
नई दिल्ली
*
भारतीय महिला क्रिकेट टीम बुधदिन राजकोटमे आयरलैंडक विरुद्ध एकदिवसीय मैचमे अपन सर्वोच्च स्कोर स्थापित कयलक। पहिने बल्लेबाजी करैत टीम ५० ओवर मे ५ विकेटक नुकसान पर रिकॉर्ड ४३५ रन बना लेलक। महिला एकदिवसीय क्रिकेटमे ई चारिम सर्वोच्च स्कोर अछि। ई कीर्तिमान न्यूजीलैंडक नाम अछि, जे २०१८ मे आयरलैंडक विरुद्ध ४९१ रन बनेने छल। कप्तान स्मृति मंधाना उत्कृष्ट प्रदर्शन कयलनि, मात्र ७० गेन्दमे अपन शतक पूरा कयलनि, जाहिसँ ओ एकदिवसीय क्रिकेटमे शतक बनेनिहार भारतक सबसँ तेज महिला क्रिकेटर बनि गेलीह। मंधाना ८० गेन्दमे १३५ रनक शानदार पारी खेललनि। मंधाना आ प्रतीकाक शतक।
एहि उल्लेखनीय पारीमे स्मृति मंधाना आ प्रतिका रावल दुनू शतक बनौलनि। मंधाना ८० गेन्दमे १३५ रन बनेलनि, जखन कि प्रतीका १२९ गेन्दमे १५४ रनक शानदार पारी खेललनि। दुनू गोटे पहिल विकेटक लेल २३३ रनक शानदार साझेदारी कयलनि। ऋचा घोष सेहो ४२ गेन्दमे ५९ रनक योगदान देलनि, जाहिसँ भारतीय टीमकेँ कुल ४३५ रन तक पहुँचबामे सहायता भेटल।
आयरलैंडक पूरा टीम ३१•४ ओवरमे मात्र १३१ रन बना आउट भऽ गेल आ भारत ३०४ रनसँ ई मैच जीत श्रृंखला ३-० सँ जीत क्लीन स्वीप कयलक।
एहि मैचसँ पहिने भारत १२ जनवरीकेँ आयरलैंडक विरुद्ध दोसर एकदिवसीय मैचमे ३७० रन बना कऽ अपनहिं कीर्तिमान तोड़ने छल। आब तीन दिनक बाद भारतीय महिला टीम ४३५ रन बना कऽ अपनहि रिकॉर्डकेँ पार कयलक अछि।
