प्रधानमंत्री नरेन्द्र मोदी १६म ब्रिक्स शिखर सम्मेलनमे भाग लेबाक लेल मंगलदिन रूसक कजान पहुँचलाह। जतय ओ रूसक राष्ट्रपति व्लादिमीर पुतिनक सङ्ग द्विपक्षीय वार्ता कयलनि। एहि दौरान पीएम मोदी एक बेर फेर रूस-यूक्रेन युद्धक उल्लेख कयलनि।
ओ रूसक राष्ट्रपतिसँ कहलनि जे समस्याक समाधान शान्तिपूर्ण माध्यमसँ होयबाक चाही। हम शान्ति आ स्थिरताक शीघ्र बहालीक पूर्ण समर्थन करैत छी। एकर सङ्गहि पीएम मोदी रूसक राष्ट्रपति पुतिनकेँ सेहो महान स्वागतक लेल धन्यवाद देलनि।
पीएम मोदी कहलनि, “हम अहाँक मित्रता आ गर्मजोशीसँ स्वागत लेल अहाँके धन्यवाद दैत छी, ई हमरा लेल खुशीक बात अछि जे हमरा ब्रिक्स शिखर सम्मेलन लेल कजान सन सुंदर शहरमे आबय केर अवसर भेटल अछि। एहि शहरसँ भारतक गहींर आ ऐतिहासिक सम्बन्ध अछि। कजानमे नव भारत वाणिज्य दूतावासक खुललासँ ई सम्बन्ध आओर मजबूत होयत।”
ओ कहलनि, “पछिला तीन मासमे दू बेर हमर रूस यात्रा हमर घनिष्ठ समन्वय आ गहन मित्रताक प्रमाण अछि। जुलाईमे मास्कोमे हमर वार्षिक शिखर सम्मेलन सभ क्षेत्रकेँ बढ़ावा देलक अछि। पिछला एक सालमे ब्रिक्सक सफल अध्यक्षताक लेल हम अहांकेँ बधाई दैत छी। १५ सालमे ई अपन लेल एकटा अलग पहचान बनौलक अछि आ आब दुनियाक कतेको देश एहिमे शामिल होबय चाहैत अछि। हम ब्रिक्स शिखर सम्मेलनमे भाग लेबए केर लेल उत्सुक छी।”
मोदी कहलनि “रूस आ यूक्रेनक बीच चलि रहल संघर्षक विषय पर हम लगातार संपर्कमे रहल छी। जेना कि हम पहिने कहि चुकल छी, हमर मानब अछि जे समस्याक समाधान शांतिपूर्ण तरीकासँ होयबाक चाही। हम शान्ति आ स्थिरताक शीघ्र बहालीक पूर्ण समर्थन करैत छी। हमर सभ प्रयास मानवताकेँ प्रमुखता दैत अछि। आबयवला समयमे सेहो भारत हरसंभव सहयोग देबय लेल तैयार अछि।”
रूसक राष्ट्रपति व्लादिमीर पुतिनक आमंत्रण पर प्रधानमंत्री मोदी रूस पहुँचल छथि। जतय मेजबान रूसक अध्यक्षतामे १६म ब्रिक्स शिखर सम्मेलन आयोजित कयल जा रहल अछि।
