शिक्षा विभागक कुव्यवस्थाक निराकरणक प्रतीक्षा

मधुबनी समदिया
*

बिहारमे शिक्षाक लेल जमीनी स्तर पर के के पाठक, अपर मुख्य सचिव, शिक्षा विभाग द्वारा सुधारक बहुत शख्त प्रयास कयल गेल। जकर असर बहुत हद तक स्कूलमे देखल जा रहल अछि। समय पर स्कूलमे शिक्षकक उपस्थिति आ पढ़ाई केर गुणवत्ता नव शिक्षकक नियुक्तिसँ बहाल भेल। मुदा शिक्षा विभाग आ जिला शिक्षा पदाधिकारी शिक्षककेँ स्कूल तक परीक्षासँ सम्बंधित सामग्री सहजतासँ उपलब्ध कराबयमे असमर्थ बुझना जाइत अछि। वर्त्तमानमे स्कूलमे हर महीना परीक्षा लेल जा रहल अछि, ताहि लेल बिहारक सभ जिलामे एकटा केंद्र पर परीक्षाक सामग्री ट्रकक माध्यमसँ भेजल जाइत अछि। एक्कहि ठाम तकरा उझलि देल जाइत छैक आ सभ स्कूल केर कहल जाइत अछि जे अप्पन स्कूलक नाम आ कोड देखि पैकेट ताकू आ लऽ जाऊ। एही व्यवस्थासँ शिक्षक सभ काल्हि दिनभरि ओहिमे लागल रहला। किछु स्कूल केर सफलता भेटल मुदा किछुकेँ तत्काल नहिं भेटल । जिनका सफलता नहिं भेटल से दोसर दिन एहि काजमे लागल रहता। परीक्षा १४ मार्चसँ शुरू भऽ रहल अछि।
जानकारी लेल बता दी जे सभ पैकेटक व्यवस्थित रूपसँ पैक कायल गेल अछि, सभ पर स्कूलक नाम आ कोड अंकित अछि। मुदा कुव्यवस्थाक कारण भरि दिन सभ शिक्षक अपन स्कुलक पैकेट ढ़ेरीमे सँ ताकयमे परेशान रहलाह आ जाबैत नहिं भेटतनि आगू सेहो रहताह।
शिक्षा विभागक तरफसँ वाट्सन +2 मधुबनीमे स्कूलके हाल तऽ इ छल जे जकरा मोन होय 2 चारि ट उठा का लऽ जाऊ। सुविधाक नाम पर तऽ किछु नहिं छल आ सुरक्षाक नाम पर सेहो सभ किछु नदारद। पूरा सामग्री लावारिश हालतमे छल।
ओतय शिक्षकसँ बात केला पर नाम नहिं छपवाक शर्त पर जानकारी देल गेल जे भरि दिन सभ अपन-अपन कोड खोजि रहल छथि। किछुकेँ कोड नहिं भेट रहल छलनि। जँ कमसँ कम कोड वाइज वा प्रखंड वाइज रहैत तऽ किछु मुश्किल कम छल। पूरा जिलाक स्कूलक सामग्रीक ढ़ेरीसँ अपन स्कूलक ताकनाई तऽ बेसी कठिन अछि। एहि सामग्री केर पोस्ट ऑफिस द्वारा सेहो सभ स्कूलमे भेजल जा सकैत छल। मुदा कि कयल जाय। शिक्षा विभाग एहिना काज करत, असगर के के पाठक कतेक चीज देखताह।
दोसर बात जे एहिमे प्रश्न पत्रक गोपनीयता सेहो प्रभावित भऽ सकैत अछि। एकर सहज निराकरणक प्रतीक्षा शिक्षकगण कय रहल छथि।