केन्द्रीय वाणिज्य मंत्री पीयूष गोयल आइ सोमकेँ सिंगापुरमे आयोजित होबयवला दोसर भारत सिंगापुर मंत्रिस्तरीय गोलमेज (आईएसएमआर) मे भाग लेताह। एहि अवधिमे, ओ द्विपक्षीय बैसार करताह आ सिंगापुरक सङ्ग भारतक व्यापार आ निवेश सम्बन्धकेँ आओर बढ़यबाक लेल प्रमुख वैश्विक व्यापारिक नेतासभक सङ्ग बातचीत करताह।
गोयलक अतिरिक्त वित्त मंत्री निर्मला सीतारमण, विदेश मंत्री जयशंकर आ रेल मंत्री अश्विनी वैष्णव सेहो आईएसएमआर सम्मेलनमे भाग लेताह। ई सम्मेलन दुनू देशक लेल बहुत खास अछि।
शिखर सम्मेलनक अवधिमे पीयूष गोयल सिंगापुरमे डीबीएस बैंक, टेमासेक होल्डिंग्स, ओएमईआरएस, केपेल इन्फ्रास्ट्रक्चर आ ओनर्स फोरम सहित प्रमुख वैश्विक व्यापारिक नेतासभक सङ्ग बातचीत करताह। गोयल भारतक उभरैत बाजारक अवसर आ एकर गतिशील विकास पथ पर द्विपक्षीय व्यापार आ निवेश केर बढ़ावा देबय केर रणनीति पर चर्चा करताह।
आईएसएमआर भारत-सिंगापुरक द्विपक्षीय सम्बन्धमे एकटा नव एजेंडा निर्धारित करबाक लेल स्थापित एकटा महत्वपूर्ण तंत्र अछि। वर्ष २०२२ मे एकर पहिल बैसार सितम्बर मासमे नई दिल्लीमे भेल छल।
मंत्रालय अपन वक्तव्यमे कहलक जे दोसर चरणक बैसारसँ दुनू पक्ष अपन रणनीतिक साझेदारीक विभिन्न पहलूक समीक्षा कऽ सकैत अछि आ एकरा आओर विस्तार आ व्यापक करबाक लेल नव मार्ग खोजि सकैत अछि।
सिंगापुर भारतक लेल एफ.डी.आई. केर एकटा प्रमुख स्रोत रहल अछि। २०२३-२४ मे देश भारतक लेल प्रत्यक्ष विदेशी निवेश (एफडीआई)क सबसँ पैघ स्रोत छल, जाहिमे अनुमानित ११.७७ अरब डॉलरक प्रवाह छल।
अप्रैल २००० सँ मार्च २०२४ धरि सिंगापुरसँ एफडीआईक संचयी प्रवाह लगभग १५९.९४ अरब डॉलर रहल। पहिल बैसारक बाद सिंगापुरक मौद्रिक प्राधिकरण (एमएएस) आ गुजरातमे अंतर्राष्ट्रीय वित्तीय सेवा केंद्र प्राधिकरण (आईएफएससीए)क बीच फिनटेक सहयोग समझौतापर हस्ताक्षर कयल गेल छल।
