इजरायलक प्रधानमन्त्री बेंजामिन नेतन्याहू कहलनि जे सऊदी अरब लग फिलिस्तीनी राज्यक स्थापनाक प्रस्तावक लेल पर्याप्त जमीन अछि। हुनकर बयान एहेन समयमे आयल अछि जखनि अमेरिकी राष्ट्रपति डोनाल्ड ट्रम्पक ‘गाजा योजना’क संबंधमे चर्चा चलि रहल अछि। इजरायली मीडियाक अनुसार, वाशिंगटन यात्राक क्रममे नेतन्याहू एकटा चैनलक संग एकटा साक्षात्कारमे कहलनि जे सऊदी अरबमे एकटा फिलिस्तीनी राज्यक स्थापना कयल जा सकैत अछि, ओहिठाम हुनका लग बहूत जमीन अछि। वाशिंगटनक एकटा होटलमे फिल्मायल गेल एकटा वीडियो सन्देशमे इजरायलक प्रधानमन्त्री कहलनि जे गाजाक सम्बन्धमे डोनाल्ड ट्रम्पक सुझावकेँ ध्यानसँ सुनल जयबाक चाही, कियैक तँ ई एकटा मौलिक विचार अछि जे पछिला किछु वर्षमे उभरल अछि।
नेतन्याहू पहिनेसँ ट्रम्पक गाजा योजनाक समर्थन कऽ चुकल छथि, जकरा अमेरिकी राष्ट्रपति मंगल (४ जनवरी) केँ एकटा संयुक्त संवाददाता सम्मेलनमे कहलनि। ट्रम्प कहलनि जे अमेरिका युद्धग्रस्त गाजा पट्टी पर कब्जा कऽ लेत आ एकरा आर्थिक रूपसँ विकसित करत, ताहि लेल फिलिस्तीनी जनसंख्याकेँ आन ठाम स्थानांतरित कऽ देल जायत। गाजाक विकासक प्रस्ताव दैत ओ स्पष्ट कयलनि जे फिलिस्तीनी सभक विस्थापन स्थायी होयत। यद्यपि, बादमे व्हाइट हाउस स्पष्ट कयलक जे गाजासँ कोनो विस्थापन अस्थायी होयत। ट्रम्पक सुझावकेँ दुनिया भरिक फिलिस्तीनी नेता लोकनि अस्वीकार कऽ देलनि, मुदा एकर प्रभाव अमेरिकी राष्ट्रपति पर नहि पड़ल। बृहस्पतिदिन ओ एकटा सोशल प्लेटफॉर्म पर एक बेर फेर अपन विचार दोहरौलनि।
