प्रधानमंत्री नरेन्द्र मोदी मंगलदिन तमिलनाडुक सलेममे एकटा जनसभाकेँ सम्बोधित कयलनि आ फेरसँ इंडिया गठबंधनपर निशाना साधलनि। एकरा संग पीएम मोदी एक बेर फेर राहुल गांधीक शक्ति वाला बयान पर, हुनका निशाना पर लैत मंचसँ कहलनि, हमर शास्त्र साक्षी अछि कि विनाश ओकर होइत छैक, जे शक्तिकेँ समाप्त करय केर विचार रखैत अछि।
यद्यपि, राहुल गाँधी अपन वक्तव्य स्पष्ट कयलनि अछि आ सोशल मीडिया प्लेटफार्म एक्स पर लिखलनि जे हुनक बयानकेँ गलत रूपसँ प्रस्तुत कयल गेल अछि।
जनतब जे लोकसभा चुनावसँ पहिने पीएम मोदी मिशन दक्षिण पर छथि। एहिसँ पहिने ओ अपन उम्मीदवारक समर्थनमे केरलक पलक्कड़मे रोड शो कयलनि। एहि दौरान पीएम मोदीक एतय आगमन पर लोक ‘भारत माता की जय’ आ ‘मोदी-मोदी’क नारा सेहो लगओलनि। पहिल बेर दक्षिणी राज्य, विशेष रूपसँ तमिलनाडुमे पीएम मोदीक रोड शोमे लोकक एतेक पैघ भीड़ देखल गेल। प्रधानमंत्री मोदी एहि रोड शो केर दौरान लोकक जखनि अभिवादन कऽ रहल छलथि, तऽ लोक भावुक भऽ रहल छल। रोड शो समाप्त भेलाक बाद जखन पीएम मोदी सलेममे जनसभाक लेल मंच पर पहुँचलाह तखन एतयसँ कहलनि, “पूरा देश तमिलनाडुमे भाजपाकेँ भेटि रहल एहि जनसमर्थनकेँ देखि रहल अछि, पूरा देश सेहो एहि पर चर्चा कऽ रहल अछि। एनडीए आ मोदीकेँ इ जे जनसमर्थन आ आशीर्वाद भेटि रहल अछि, से डीएमके सरकारकेँ रातिक नींद उड़ा देलक अछि।”
प्रधानमंत्री मोदी आगू कहलनि “आब तमिलनाडु निर्णय लेलक अछि जे १९ अप्रैलकेँ प्रत्येक वोट भाजपा आ राजगकेँ भेटत। आब तमिलनाडु ई निर्णय लेलक अछि – ‘अबकी बार ४०० पार’ निश्चित अछि।”
एकरा संग पीएम मोदी आगू कहलनि, “एखनि तऽ चुनाव अभियानक शुरूआत भेल अछि। मुदा इंडी एलायंसक योजना मुम्बई केर हुनक पहिले रैलीमे खुलि कऽ सामने आबि गेल अछि। ओ कहि रहल छथि जे हिन्दू धर्म केर जाहि शक्तिमे आस्था होइत अछि, हुनका एहि शक्तिकेँ नष्ट करय केर अछि। तमिलनाडुक प्रत्येक व्यक्ति जनैत अछि जे हिन्दू धर्ममे शक्ति किनका कहैत अछि।”
पीएम मोदी कहलनि “इंडी एलायंसक लोक बेर-बेर हिन्दू धर्मक अपमान जानि-बूझि कऽ करैत अछि। हिन्दू धर्मक विरुद्ध हिनक प्रत्येक वक्तव्य बहुत नीक जकाँ सोचि-समझि कऽ होइत अछि। अहाँ देखब, डीएमके आ कांग्रेसक इंडी गठबंधन कहियो आर कोनो धर्मक अपमान नहिं करैत अछि, कोनो आन धर्मक विरुद्ध हुनक जीभसँ एकटा शब्द नहिं निकलैत अछि। मुदा ओ सभ हिन्दू धर्मकेँ गारि पढ़बामे एक सेकण्ड नहिं लगाबैत छथि। ओ सभ संसदमे तमिल संस्कृतिक प्रतीक पवित्र संगोलक संसदमे स्थापनाक विरोध कयलनि।”
ओ कहलनि कि “हमर शास्त्र साक्षी अछि जे, विनाश ओकर होइत अछि जे शक्तिकेँ नष्ट करबाक विचार करैत अछि। हमर तमिलनाडु सबसँ पहिने १९ अप्रैलसँ एहन खतरनाक विचारकेँ पराजित करब शुरू करत। मोदी देशक नारी शक्तिक प्रत्येक समस्याक सोझाँ ढ़ालक रूपमे ठाढ़ अछि। महिलासभकेँ धुआं मुक्त जीवन देबाक लेल हम उज्ज्वला एलपीजी गैस कनेक्शन देलहुँ, निःशुल्क चिकित्साक लेल आयुष्मान योजना शुरू कयलहुँ। एहि सभ योजनाक केन्द्रमे नारीये शक्ति अछि।”
