बिहार विधानसभामे विपक्षक नेता तेजस्वी यादव बुधदिन एक बेर फेर मतदाता सूची सत्यापनक संबंधमे सरकार पर सवाल उठेलथि। ओ कहलनि जे पहिने मतदाता सरकार चुनैत छल, आब सरकार मतदाताकें चुनि रहल अछि।
पटनामे आयोजित प्रेस कांफ्रेंसमे ओ कहलनि, जॅं एक प्रतिशत लोकक नाम डिलीट भऽ जाएत तॅं करीब सात सॅं आठ लाख लोकक नाम डिलीट भऽ जाएत। भाजपा नेता सब पर निशाना साधैत ओ कहलनि जे, ई लोकनि एकटा बयान देलनि जे बिहारमे बांग्लादेश, म्यांमार आ नेपालक मतदाता छथि, जखनि कि सुप्रीम कोर्टमे हलफनामा देल गेल जे एहिमे एहेन कोनो बात नहि लिखल गेल अछि। विदेशक विषयमे कोनो चर्चा नहि अछि।
एहि दौरान ओ विधानसभाक बारेमे सेहो चर्चा करलनि। तेजस्वी यादव कहलनि जे, जखनि ओ सदनमे बजैत छलाह तखनि उपमुख्यमंत्री सेहो टिप्पणी कयलनि। ओ कहलनि जे हम अध्यक्षक अनुमतिसँ बाजि रहल छी। उपमुख्यमंत्रीक बयान सेहो अशोभनीय अछि। जॅं विपक्षी नेता सदनमे नहि बजताह तखन के बाजत ? सदनमे जॅं सवाल नहि पूछल जाएत तखनि ओकर जवाब के आ कतय देत ?
ओ पुछलनि जे जखनि सदनक नेता आ विपक्षी नेता विधानसभामे बाजि रहल छलाह तखनि उपमुख्यमंत्री विजय सिन्हा किएक टोकलनि ? हमरा सबकें लगैत अछि जे जॅं सब दलक नेता सब एसआईआर पर बात कयने रहैथि तखन एहि विषय पर चर्चा होइत।
ओ कहलनि जे हल्का राजनीति सत्तामे बैसल लोक करैत अछि। ओ कहलनि जे, ई लोक सदनक गरिमा कम करैत छथि। ओ विधानसभा अध्यक्षकें सेहो धन्यवाद देलनि जे ओ उपमुख्यमंत्रीकें डांटलनि आओर साफ तौर पर कहलनि जे हम सदन नहिं चलायब।
तेजस्वी यादव मुख्यमंत्री नीतीश कुमार पर सेहो तंज कसैत पूछलथि जे सदनमे जे चर्चा भऽ रहल अछि ओकरा बुझबामे सक्षम छी वा नहि। हुनका प्रति सहानुभूति अछि। आइयो ओ अपन पुरान बात दोहरबैत रहलाह। ओ कहला जे विधायक भाई वीरेंद्रक बयान सही अछि आ ओ ककरो नाम नहि लेलथि। ओ ठीके कहने छथि जे सदन ककरो बापक नहि अछि।
