बिहार विधानसभामे प्रतिपक्षक नेता तेजस्वी यादव दावा कयलनि जे २०२४क लोकसभा चुनावक परिणाम बिहारसँ आओत। तेजस्वी यादव मंगल दिन पटनामे संवाददाता सबसँ बातचीत करैत कहलनि जे हम लोकसभा चुनावमे मजबूतीसँ लड़ब आ परिणाम बिहारसँ आओत, ई निश्चित अछि। तेजस्वी यादव एखनि कहलनि अछि जे बिहारमे सीटक बंटवाराकेँ लऽ कऽ महागठबंधनमे कोनो भ्रम नहिं अछि। ओ कहलनि जे जल्दिये हम सब बिहारक सब सीट आपसमे बांटि लेब।
पटना रैली मे लालू प्रसाद द्वारा प्रधानमंत्री नरेन्द्र मोदी पर व्यक्तिगत हमला पर तेजस्वी यादव कहलनि जे लालू जी सवाल उठौने छलाह आ ओ सही छथि। लालू जीक प्रश्नक उत्तर एखन धरि नहिं भेटल अछि। लालू जी कोनो गलत नहिं कहलखिन। हम हिन्दू धर्मक पालन करैत छी। हम सभ सेहो पूजा करैत छी। हमर घरमे एकटा मन्दिर सेहो अछि आ ओकर पूजा करैत छी। हमर घरमे जखन कियो मरि जाइत अछि तखनि केश छिलाओल जाइत अछि। लालू जी किछु गलत नहिं कहलैथ।तेजस्वी कहलनि जे अहाँ हिन्दू-मुस्लिमक बात करब, मुदा केश कि एक नहिं छिलायब।लालू जीक बयान कोनो एजेंडा नहिं अछि। एहि बेर देशमे गरीबी आ बेरोजगारी पर चुनाव होएत।
आगा तेजस्वी यादव कहलखिन जे हम सब बिहारमे जन विश्वास यात्रा कयलहुं आ दिन-राति हर समय लोकक आशीर्वाद आ प्रेम भेटल। मात्र १० दिनक भीतर हम रैलीकेँ सफल बना देलहुं। हम सबके धन्यवाद दैत छी जे रैलीक दिन खराब मौसमक बावजूद पटनाक गांधी मैदानमे तीन लाखसँ बेसी लोक उपस्थित भेलाह। ओ कहलनि जे एहि रैलीसँ पता चलैत अछि जे गठबंधन कतेक मजबूत अछि। बिहारक संदेश पूरा देश धरि चलि गेल अछि आ एकर प्रभाव आबयवला चुनावमे सेहो देखल जायत।
पुनः तेजस्वी यादव कहलखिन कि अपन कार्यकालक १७ महीनामे हम सब वर्गक लोककेँ नौकरी देलहुं। खेलक क्षेत्रमे पदक लाबय वालाकेँ नौकरी देलहुं मुदा भाजपा मात्र नफरत पसारय केर काज कयलक, जखनि कि हम सबके हाथमे कलम देलहुं। तेजस्वी यादव बिहारमे कैबिनेटक विस्तारमे देरी पर सेहो सवाल उठबैत कहलखिन कि एखन धरि कैबिनेट विस्तार किएक नहिं भेल अछि एकर जवाब देबाक चाही। मौजूदा सरकारमे कियो काज नहिं कय रहल अछि। ओ कहलनि जे हमर पार्टीसँ जे विधायक बगावत कयलक अछि, तकर खिलाफ कड़गर कारवाई कयल जाएत। तेजस्वी सीट शेयरिंग पर जवाब दैत कहलनि हमसभ एनडीएसँ पहिने सीट बंटवारा कय लेब।
