अमर जीक तेसर पुण्यतिथि पर संस्थान परिवार अर्पित कयलक श्रद्धांजलि

दरभंगा समादिया
*

मैथिली साहित्यक शीर्ष पुरूष पं चंद्रनाथ मिश्र अमर जीक तेसर पुण्यतिथि पर उपस्थित लोकनि दिवंगत पुण्यात्माकेँ चित्र पर पुष्पांजलि अर्पित कऽ हुनका भाव भरल श्रद्धांजलि प्रदान कयलनि। संस्थानक दिससँ श्रद्धा सुमन अर्पित करैत महासचिव डा बैद्यनाथ चौधरी बैजू कहलनि जे अमर जी बहुविधामे रचनाशील होयबाक संगहि अनुशासन आ समय केर अत्यंत पाबंद छलाह। ओ कहलनि जे मैथिली साहित्य जगत केर महा मनीषी आ विद्यापति सेवा संस्थानक आजीवन अध्यक्ष रहल पं चन्द्रनाथ मिश्र अमर अपन कृतिमे सदति अमर रहताह। विद्यापति सेवा संस्थानक प्रधान कार्यालयमे आयोजित शोक सभामे ओ कहलनि जे जनक-जानकीक भाषा मैथिलीक समृद्धि लेल देल गेल हुनक योगदानकें कहियो नहिं बिसरल जा सकैछ।
मैथिली अकादमीक पूर्व अध्यक्ष पं कमलाकांत झा अमरजी केर कृतित्व एवं व्यक्तित्वक विस्तारसँ चर्चा करैत हुनका सरल व्यक्तित्व, विलक्षण कृतित्व एवं सामाजिक प्रवृत्तिक निष्णात विद्वान बतौलनि।
मीडिया संयोजक प्रवीण कुमार झा अमरजीक विभिन्न विधामे पारंगत प्रबुद्ध साहित्यकार होयबाक संगहि एकटा कुशल रंगकर्मी बतबैत कहलनि जे अपन अनमोल कृतिमे ओ सदैव अमर बनल रहताह। दुर्गा नन्द झा कहलनि जे अमरजी एकमात्र एहन साहित्यकार भेलाह, जिनका लग मिथिला, मैथिली आ मैथिलक विकासक चिंतनक समग्र सामग्री उपलब्ध छल। आशीष चौधरी हुनक कृतित्व पर आधारित शोध कार्यक बढ़ावा देल जायब हुनका प्रति सुच्चा श्रद्धांजलि बतौलनि।
शंभु नाथ मिश्र अमर जीक मैथिली साहित्यक विकासक दिव्य दृष्टिसँ संपन्न कालजयी साहित्यकार बतबैत विभिन्न विधामे मैथिली साहित्यक भंडारकेँ भरबामे हुनक महत्वपूर्ण योगदानकेँ रेखांकित कयलनि।