बिहारक मधेपुरामे बाबा सिंहेश्वर नाथ धाममे साओनक तेसर सोमवारी पर श्रद्धालुक भारी भीड़ उमड़ल छल। हर हर महादेव केर जयकारा आ भक्ति गीतसँ पूरा इलाका गुंजयमान भs गेल।
रविदिन आधा रातिसँ नेपाल, बंगाल, सीमावर्ती मिथिला क्षेत्र, मिथिला क्षेत्रक श्रद्धालु लोकनिक भीड़ मंदिर परिसरमे जमा होबय लागल।
राति डेढ़ बजे पट खुजैत देरी मंगला आरतीसँ बाबाक दर्शन आ पूजाक प्रक्रिया शुरू भs गेल। भोरहिसँ श्रद्धालु कतारबद्ध भs कs बाबाकेँ जल चढ़ाबय लेल जमा होबय लगलाह।
एडीएम अरुण कुमार सिंह, एएसपी प्रवेन्द्र भारती, ट्रैफिक डीएसपी चेतनानंद झा केर संग अन्य अधिकारी आ न्यास सदस्य विधिवत सरकारी पूजा अर्पित कयलनि। पहिल दू सोमवारीक तुलनामे एहि बेर भक्तक भीड़ रिकॉर्ड स्तर पर छल। एखनि धरि दू लाखसँ बेसी भक्त जलाभिषेक कयलनि अछि आ भक्तक कतार लगातार मंदिर तक पहुंचि रहल अछि।
मंदिर मार्ग लाल आ पीयर रंगक कपड़ा पहिरने कांवरिया सभसँ भरल अछि | विभिन्न स्थान पर स्थानीय युवा आ सामाजिक संस्था द्वारा सेवा शिविरक स्थापना कयल गेल अछि, जतय जलपान, भोजन आ विश्रामक व्यवस्था कयल गेल अछि |
श्रद्धालुक भारी भीड़केँ देखैत जिला प्रशासन सुरक्षाक कड़ा इंतजाम कयलक अछि। मजिस्ट्रेट केर नेतृत्वमे हर कोनामे पुलिस बलक तैनाती कयल गेल अछि। पूरा सिंहेश्वरमे 135 ठाम मजिस्ट्रेट आ पुलिसकर्मीकेँ तैनात कयल गेल अछि। भीड़ नियंत्रणक लेल नाग गेट बंद राखल गेल। भोरे भीड़क कारण दंड प्रणामी मार्गकेँ किछु समय तक बंद करय पड़ल, मुदा बादमे रास्ता खोलल गेल।
