केंद्रीय कपड़ा मंत्री गिरिराज सिंह दावा कयलथि जे बिहारमे एक बेर फेर नीतीश कुमारक नेतृत्वमे एनडीए सरकार बनत। जमशेदपुरक समीप आदित्यपुरमे सोमदिन मीडियासँ गप्प करैत केंद्रीय मंत्री कहलनि जे बिहारक जनता लालू प्रसाद यादव आओर हुनकर परिवारकेँ पूर्ण रूपसँ नकारि देलक अछि। लालू यादव अपन बेटा तेजस्वी यादवकेँ बिहारक सीएम बनेबाक जे सपना देखि रहल छथि ओ मुंगेरी लालक मधुर सपना जेकां चकनाचूर भऽ जाएत।
राजद सुप्रीमो लालू प्रसाद यादवक तुलना फिल्म ‘शोले’ केर गब्बर सिंहसँ करैत गिरिराज सिंह कहलनि, हुनकर शासन कालमे बिहारमे कियो सुरक्षित नहि छल। जखनि लोक घरसँ बाहर निकलैत छल तऽ ओकर माय ओकर सुरक्षित वापसी केर प्रार्थना करैत छलीह। बहिन-बेटीक मर्यादा खुलेआम लूटल गेल। बिहारक जनता ओहि तरहक गब्बर राजकेँ फेरसँ वापस नहि आबय द सकैत अछि।
केंद्रीय मंत्री झारखंडक हेमंत सोरेन सरकार पर बांग्लादेशी घुसपैठियाकेँ सुरक्षा देबय केर आरोप लगौलनि। ओ कहलनि, सरकार वोट बैंकक राजनीतिमे बांग्लादेशी मुसलमानकेँ अतिथि जेना बजा रहल अछि। घुसपैठियाकेँ बसा राज्यक आंकड़ामे बदलाव कयल गेल अछि। राज्यक आदिवासी आ स्थानीय लोककेँ हाशिया पर राखल जा रहल अछि। बांग्लादेशी घुसपैठक मुद्दा उठबैत चम्पई सोरेन झारखंड मुक्ति मोर्चासँ संबंध तोड़ि भाजपामे शामिल भऽ गेल छथि जाहिसँ झारखंडकेँ बांग्लादेश बनयसँ रोकल जा सकय।
गिरिराज सिंह कहलनि, प्रधानमंत्री नरेंद्र मोदीक नेतृत्वमे भारत 2047 धरि दुनिया केर सर्वश्रेष्ठ देशमे शामिल भऽ जायत। ओ युवासँ प्रधानमंत्री केर परिकल्पनाक भारतक निर्माणमे आगू आबय केर आह्वान कयलनि। केंद्रीय मंत्री कहलनि, स्टार्टअपसँ जुड़य वाला युवा देशक छवि बदलबामे लागल छथि।
