स्लोवाकियाक लोकप्रिय प्रधानमंत्री रॉबर्ट फिको काल्हि गोलीबारीमे घायल भऽ गेलाह। हुनका इलाजक लेल अस्पताल लऽ जायल गेल अछि। समाचार टेलीविजन स्टेशन टीए३ केँ मुताबिक, ई घटना राजधानीसँ लगभग १५० किलोमीटर उत्तर-पूर्वमे हैंडलोवा शहरमे भेल। एहिमे कहल गेल अछि जे एकटा संदिग्धकेँ हिरासतमे लेल गेल आ पुलिस घटनास्थलकेँ सील कए देलक।
रिपोर्टक अनुसार, रूस समर्थक ५९ वर्षीय पीएम फिको’केँ हैंडलोवा शहरमे एकटा सांस्कृतिक सामुदायिक केन्द्रक सोझाँ गोली मारि देल गेल, जतय एकटा सरकारी बैसार भऽ रहल छल। घटनास्थल पर मौजूद पत्रकारक अनुसार, गोलीबारीक बहुत आवाज सुनल गेल। स्लोवाक नेताकेँ अस्पताल लऽ जायल गेल आ हुनकर कथित हमलावरकेँ पुलिस हिरासतमे लऽ लेलक अछि। स्लोवाक मीडियासँ प्राप्त प्रारम्भिक जानकारीक अनुसार, फिकोकेँ जे गोली मारल गेल ताहिमे एकटा पेट पर, एकटा माथ पर मारल गेल। हुनकर हालत गंभीर अछि।
स्लोवाक टीएएसआर समाचार एजेंसी कहलक जे संसदक उपाध्यक्ष लुबोस ब्लाहा संसदक एकटा सत्रक दौरान एहि घटनाक पुष्टि कयलनि आ अगिला सूचना धरि संसदक सत्र स्थगित कऽ देलनि। स्लोवाकियाक राष्ट्रपति ज़ुज़ाना सापूतोवा कहलनि जे ओ एहि “क्रूर हमला”सँ “स्तब्ध” छथि। समाचार सम्प्रेषण तक हुनकर स्वास्थ्यक बारेमे अस्पताल या सरकारक तरफ सँ आगुक अपडेटक कुनु आधिकारिक जानकारी नहिं देल गेल छल।
