अपराध शिवहरमे जीजा-सालीक शव गाछसँ लटकल भेटल, अफेयर सामने आयल Maithil Punarjagran Prakash March 19, 2024 0 Comments शिवहर समदिया * जिलाक श्यामपुर भटहां थाना क्षेत्रक जहांगीरपुर गाममे मंगलदिन भोरे जीजा-सालीक शव लीचीक गाछसँ लटकल भेटल। सूचना भेटलाक बाद एसडीपीओ अनिल कुमार आ एसएचओ सुनील कुमार पुलिस बलक संग घटनास्थल पर पहुँचलाह आ मामिलाक जाँच कयलनि। संगहि दुनू शवकेँ कब्जामे लऽ कऽ पोस्टमार्टम लेल सरोजा सीताराम सदर अस्पताल पठाओल गेल । मृतकक परिजनसँ पूछताछ कएल जा रहल अछि। मृतक जीजाक पहिचान पूर्वी चंपारण जिलाक राजेपुर थाना क्षेत्रक ताजपुर सरैया निवासी राकेश कुमारक रूपमे भेल अछि आ सालीक पहचान श्यामपुर भटहां थाना क्षेत्रक जहांगीरपुर गांवक रानी कुमारी भेल अछि। एहि घटनाक बाद क्षेत्रमे चर्चाक बाजार गरम भऽ गेल अछि। की ई हत्या वा ऑनर किलिंगक मामला अछि ? एकर पता लगाबय लेल पोस्टमार्टम रिपोर्ट महत्वपूर्ण भऽ गेल अछि। एसडीपीओ अनिल कुमार कहलनि जे एहि मामिलाक जाँच कयल जा रहल अछि। एसपी अनंत कुमार राय कहलनि जे ई मामिला प्रेम प्रसंग बुझाइत अछि। एसडीपीओक नेतृत्वमे पुलिस टीम एहि मामिलाक जाँच कऽ रहल अछि। स्थानीय लोकक अनुसार, रानीक अपन बहनोईसँ प्रेम सम्बन्ध छल। दुनू गोटेक स्वजन एकर विरोध कए रहल छलाह। दू दिन पहिने राकेश अपन ससुराल अयल। मंगलदिन भोरे, दुनूक शव गामसँ सटल लीचीक गाछसँ लटकल भेटल। Spread the love