सुरक्षित वापसीक लेल भारतीय विदेश मंत्रालयकेँ देलनि धन्यवाद
*
नई दिल्ली
*
ईरान द्वारा बंधक बनाओल गेल जहाजक चालक दलक महिला सदस्य एन टेसा जोसेफ हालहिमे भारत घुरि आयल छथि। एन टेसा भारतीय विदेश मंत्रालयकेँ सुरक्षित वापसीक लेल धन्यवाद देलनि आ इहो कहलनि जे भारत सरकार अन्य सदस्यसभकेँ सेहो रिहा करबाक प्रयास कऽ रहल अछि।
एन टेसा जोसेफ शुक्रदिन एकटा बयानमे कहलनि, “हमरा बहुत लोककेँ धन्यवाद देबय केर अछि। सबसँ पहिने हम विदेश मंत्रालयक आभारी छी जे एतेक जल्दी रिहाई कयलक आ एहन लोकक प्रति सेहो आभारी छी जकरा हम नहिं जानैत छी मुदा हमर रिहाई सुनिश्चित करबामे सहायता कयलहुँ। हम सभकेँ धन्यवाद दैत छी। “हम कहियो आशा नहि कयने छलहुं जे एहन किछु होयत। हम जनैत छलहुं जे झगड़ा चलि रहल अछि, मुदा एहन होयबाक आशा नहिं छल। हमर जहाज जब्त कऽ लेल गेल, मुदा जहाज पर कब्जा करयवला सभ पूरा चालक दलक नीक देखभाल कयलनि। भोजन आदिमे कोनो समस्या नहिं छल। हमसभ मेसमे खाना बना सकैत छलहुँ। मुदा खएलाक बाद अपन केबिनमे वापस जयबाक रहैत छल। ओ सभ हमरा कोनो नुकसान नहिं पहुँचेलथि।”
जोसेफ कहलनि “जहाज पर हमरा सहित केरलक चारि गोटे छलाह। आब १६ भारतीय एखनो ओइठाम छथि। काल्हि जखन ओ भारतीय अधिकारीसभसँ गप्प कयलनि तखन हुनका कहल गेल जे बाकी लोकसभकेँ जल्दिये छोड़ि देल जायत। भारत सरकार चालक दलक सदस्यक रिहाईक लेल कठिन परिश्रम कऽ रहल अछि। ईरानमे दूतावास जहाज पर सवार भारतीय चालक दलक सङ्ग लगातार संपर्कमे अछि। चालक दलक सदस्यक स्वास्थ्य ठीक अछि आ ओ अपन परिवारक सम्पर्कमे छथि।”
इजरायल आ ईरानक बीच तनाव जारी अछि। ईरानक आरोप अछि जे दमिश्कमे ओकर दूतावास पर भेल हमलाक पाछाँ इजरायलक हाथ अछि। ओहि हमलामे ईरानी सेनाक दूटा शीर्ष कमांडर सहित सात गोटे मारल गेल छलाह। एहि हमलासँ नाराज ईरान ओमानक खाड़ीसँ गुजरय बला एकटा इजरायली जहाज पर कब्जा कऽ लेलक। एहि जहाज पर चालक दलमे १७ भारतीय छलाह, जाहिमेसँ एकटा महिला सदस्य एन टेसा जोसेफक सुरक्षित वापसीक बाद आब क्रू केर १६ सदस्य ईरानक हिरासतमे अछि।
हालहिमे ईरान सेहो इजरायल पर जबरदस्त हवाई हमला कयलक। मुदा, एहि हमलामे इजरायलकेँ बेसी नुकसान नहिं भेल आ ओकर वायु रक्षा प्रणाली अधिकांश हमलाकेँ विफल कऽ देलक। मुदा, एहि घटनाक बादसँ दुनू देशक बीच युद्धक आशंका बढ़ि गेल अछि। आब खबर आबि रहल अछि जे इजरायल ईरान पर हमला कयलक अछि, मुदा एखन धरि एकर पुष्टि नहिं भेल अछि। मीडिया रिपोर्टमे कहल जा रहल अछि जे ईरानक हवाई अड्डापर विस्फोटक आवाज सुनल गेल अछि।
