मैथिली भाषाकेँ डिजिटल सम्मान भेटय : राज्यसभामे संजय झा
नई दिल्ली!! लिपिसँ भाषाक सम्मान एवं पहिचान होइत छैक। मैथिली भाषाकेँ डिजिटल पहिचान भेटवाक लेल राज्यसभामे आखिरकार संजय कुमार झा आवाज उठेलनि। एहि २१म शताब्दीमे मिथिलाक्षर साक्षरता अभियान विलुप्तप्राय भेल जाहि मिथिलाक्षर लिपिक पुनः उदय करेलक, तकरा जँ सरकारक सहयोग भेटतै तऽ निश्चित रुपसँ ई मिथिलावासीक उत्साह बढ़ाबयवाला बात होएत।
जनतबक अनुसार जेडीयू सांसद संजय कुमार झा राज्यसभामे मैथिली भाषाक संरक्षण, संवर्धन आ डिजिटल उपयोगकेँ बढ़ावा देबाक लेल बुधकेँ एकटा महत्वपूर्ण मुद्दा उठौलनि अछि।
ओ मैथिली भाषाक प्राचीन लिपि (तिरहुता/वैदेही) अर्थात मिथिलाक्षरकेँ गूगल कीबोर्ड, एंड्रॉयड–iOS आ सोशल मीडिया प्लेटफॉर्म्स पर शामिल करबाक लेल जरूरी डेग उठाबय केर केंद्र सरकारसँ आग्रह कयलनि।
संजय कुमार झा कहलनि कि एहि पहलसँ मैथिली भाषी लोक डिजिटल माध्यम पर अपन मातृभाषाक सहज आ स्वाभाविक उपयोग कय सकतथि।
आगू ओ कहलनि कि ई डेग नहिं मात्र हमर समृद्ध भाषाई विरासतकेँ संरक्षणक दिशामे महत्वपूर्ण अछि, बल्कि देश-विदेशमे रहि रहल करोड़ों मैथिली भाषीक लेल अपन लिपिमे डिजिटल अभिव्यक्तिकेँ मजबूत करत। ओ एकरा डिजिटल समावेशन एवं मैथिली भाषा, तिरहुता/वैदेही अर्थात मिथिलाक्षर लिपि आ मिथिलाक समृद्ध भाषाई विरासतक संरक्षणक दिशामे एकटा डेग करार देलनि।
