भाजपा सहित राजगक घटक दल राष्ट्रीय जनता दलक चुनावी घोषणापत्रमे कयल गेल वादा पर पलटवार कयलनि अछि। भाजपा प्रदेश अध्यक्ष सम्राट चौधरी कहलनि जे कहल गेल अछि जे एहिमे १ करोड़ रोजगार देल जायत। जँ अहाँ १ करोड़ नौकरी देब तऽ कतेक जमीन लेब ? तेजस्वी यादवक घोषणापत्र पर उप मुख्यमंत्री सम्राट चौधरी कहलखिन कि ओ एक करोड़ युवाकेँ सपना देखा रहल छथि, तेजस्वी यादवसँ पूछल जेबाक चाही जे एक करोड़ लोककेँ रोजगार देताह तऽ जमीन कतेक लेताह।
एम्हर जदयू केर मुख्य प्रवक्ता आ बिहारक पूर्व मंत्री नीरज कुमार राजद पर कटाक्ष करैत कहलनि कि ओ स्वयं २३ सीट पर चुनाव लड़ि रहल छथि आ राष्ट्रीय संदर्भक घोषणापत्र जारी कए पूरा देशक राजनीतिक एजेंडा तय कए रहल छथि। कुमार आगू कहलनि जे २३ सीट पर चुनाव लड़निहार राजदक नेता एतेक धरि नहिं कऽ सकल जे एहि अवसर पर कमसँ कम अपन सहयोगी दलक नेताकेँ बजा कऽ बगलमे बैसा लैतथि। ओ व्यंग्यात्मक रूपसँ कहलनि जे ओ संतरा खा रहल छथि आ सहकर्मीकेँ छिलका दऽ रहल छथि आ छिलकाक रस अपन आँखिमे ढ़ारि रहल छथि।
लोजपा (राम विलास) प्रमुख चिराग पासवान कहलनि जे बिहारक जनता जनैत अछि जे राजदक लोक कोना नौकरी दैत अछि। ओ कहलनि जे ई नीक अछि जे तेजस्वी नौकरीक बात कऽ रहल छथि, मुदा हुनका बतेबाक चाही जे जँ ई लोक सचमुच एक करोड़ लोककेँ नौकरी दऽ सकैत छथि तखन हिनक परिवारक सदस्य एतेक दिन धरि सत्तामे रहल, तऽ किएक नहिं देलनि । एतबे नहिं, ई बात तऽ सभ जनैत छथि जे ई लोकसभ कोना लोकसभकेँ नौकरी देलनि।
एमहर हिन्दुस्तानी अवाम मोर्चाक संरक्षक आ गया उम्मीदवार जीतन राम मांझी राजद घोषणापत्र पर चुटकी लैत सोशल मीडिया एक्स पर लिखलनि जे एहिमे भरिसक किछु बात छूटि गेल अछि, जे एहि प्रकारसँ अछि :- अमेरिकाकेँ भारतमे मिला देब, सूरज पश्चिमसँ उगायब, समुद्रक पानिकेँ मीठ बना देब, पहाड़ हवामे उड़त। वास्तविक बात तऽ ई अछि जे तेजस्वी यादव जनैत छथि जे हुनकर सरकार बनत तऽ नहिंये, तखन ओ किछु घोषणा कऽ सकैत छथि। राजद अपन घोषणापत्रमे एक करोड़ लोककेँ नौकरी देबाक बात कयलक अछि, संगहि रोजगार, किसान, महिलाक लेल कतेको वादा कयल गेल अछि। याद दिआबी जे २०१९ केर चुनावमे राजदकेँ लोकसभामे एको सीट नहिं भेटल छल।
