एडीआर रिपोर्टक अनुसार २०२२-२३ मे ३९ टा कार्पोरेट ३६३ करोड़ देलक चुनावमे डोनेशन

जाहिमे ७० प्रतिशत अर्थात २५९ करोड़ प्रायः भाजपाकेँ प्राप्ति

*

नई दिल्ली

*

कार्पोरेट ओसूली करैत अछि जनतासँ , जाहि ओसूलीमे सत्ता सहायक होईत छैक, जाहि केर लेल सत्ताकेँ कार्पोरेट डोनेशन दैत छैक। साधारणतः इएह फंडा छैक, जे सभकेँ ज्ञात छैक, पब्लिक सभ जानैत अछि। तऽ ई जे पार्टी फंडक नाम पर धन जमा होईत अछि आ चुनावमे बहायल जाइत अछि, तकर खामियाजा आखिर जनते भुगतैक छैक, मुदा जनताक पाई-पाई केर हिसाब राखयवाला सरकार पार्टी फंडक नाम पर कतेको पाई लऽ सकैत अछि आ ताहि लेल सहूलियत छैक। देखू ई रिपोर्ट आ कनी चिंतन करु, मुदा एहि मुद्दा पर सभ दल एक रहैत अछि, कारण फंड तऽ सभ दलकें चाही।

एसोसिएशन फॉर डेमोक्रेटिक रिफॉर्म्स (एडीआर)क नवीनतम रिपोर्टसँ पता चलैत अछि जे २०२२-२३क अवधिमे ३९ कॉरपोरेट चुनाव मदमे ३६३ करोड़ टाका जारी कयलक अछि। एहिमे सँ असगर भाजपाकेँ लगभग ७० प्रतिशत भेटल अछि। आंकड़ासँ पता चलैत अछि जे एहि अवधिमे भाजपाकेँ २५० करोड़ टाकासँ बेसी भेटल अछि। एडीआरक रिपोर्टमे कहल गेल अछि जे तेलंगानाक भारत राष्ट्र समिति (टीआरएस) केँ कुल दानक २५ प्रतिशत भेटल।

एडीआरक रिपोर्टक अनुसार ३४ कॉरपोरेट घराना चुनावक लेल ३६० करोड़ टाकासँ बेसी खर्च कयलक अछि। १ टा कॉर्पोरेट समाज इलेक्टोरल ट्रस्टकेँ २ करोड़ रूपैया जारी कयलक। 2 कंपनी परिवर्तन इलेक्टोरल ट्रस्टक लेल ७५.५ लाख रुपया देलक। ओतहि दूटा कंपनी ट्रम्फ इलेक्टोरल ट्रस्टकेँ ५० लाख टाका जारी कयलक। साझा कयल गेल आंकड़ाक अनुसार, भाजपाकेँ २५९.०८ करोड़ रुपैया अर्थात लगभग ७० प्रतिशत भेटल। ओतहि भारत राष्ट्र समितिकेँ २५ प्रतिशत यानी ९० करोड़ रुपया भेटल अछि।

एडीआरक रिपोर्टक अनुसार, वाईएसआर कांग्रेस, आम आदमी पार्टी आ कांग्रेस पार्टी सहित तीनटा अन्य राजनीतिक दलकेँ मिलाकऽ लगभग १७.४० करोड़ टाका भेटल। २५६.२५ करोड़ रुपैया प्रूडेंट इलेक्टोरल ट्रस्टकेँ दान देल गेल। एकर तुलना २०२१-२२ मे भाजपासँ करी, तऽ पार्टीकेँ ३३६.५० करोड़ रुपैया भेटल। जखन कि १.५ करोड़ टाका समाज इलेक्टोरल ट्रस्टकेँ दान देल गेल अछि। कांग्रेसक समाज इलेक्टोरल ट्रस्टकेँ ५० लाख टाका भेटल। प्रूडेंट इलेक्टोरल ट्रस्टक तरफसँ भाजपा, बीआरएस, वाईएसआर कांग्रेस आ आम आदमी पार्टीकेँ धन मुहैया कराओल गेल।