रामजन्म पर्व रामनवमी केर अवसर पर दरभंगा शहरक लक्ष्मीसागर मोहल्लामे बुधदिन भव्य पूजनोत्सव आ सांस्कृतिक भजन संध्याक आयोजन कयल गेल। बीएसएनएल केर सेवानिवृत कार्यालय अधीक्षक अशोक कुमार झा केर आवासीय परिसरमे स्थापित राम दरबारमे प्रातः काल सभ स्थापित मूर्ति केर पारंपरिक विधिसँ स्नान करयला उपरांत नव वस्त्रसँ सुसज्जित कऽ हुनक पूजन एवं स्तुति कयला संग छप्पन भोग लगाओल गेल। संध्या वेलामे आयोजित सांस्कृतिक भजन संध्यामे पारंपरिक सोहर आ बधईया गीतक दमदार प्रस्तुतिसँ कलाकार लोकनि सभक मोन जीति लेलनि। मिथिलाक धरोहरि अमता घरानाक साहित्य मल्लिक केर प्रस्तुतिमे दर्शक दीर्घासँ आह आ वाह केर स्वर गुंँजैत रहल। हुनका संग मैथिली मंचक स्वनामधन्य स्थापित कलाकार नीरज कुमार झा आ अमन भारद्वाज सेहो एकसँ बढ़ि एक भावपूर्ण प्रस्तुति दऽ वातावरणमे भक्ति रस घोरबामे कोनो कोर कसर नहि छोड़लनि। तबला पर सुधांशु आ प्रसिद्ध कैसियो वादक शिवकुमार संग नीरज झा अपन अँगुरीक जादू जमिकऽ बिखेरलनि। कार्यक्रमक दौरान वाद्ययंत्र केर जुगलबंदी सेहो दर्शक लोकनिकेँ खूब नीक लगलनि।
एहिसँ पहिले आयोजनक विधिवत शुभारंभ अशोक कुमार झा, वरिष्ठ साहित्यकार मणिकांत झा संग दीप प्रज्ज्वलित कऽ केलनि। अपन संबोधनमे अशोक कुमार झा कहलनि जे मर्यादा पुरुषोत्तम राम हमर समाजक लेल आदर्श पुरुष छथि आ आबय बाला पीढ़ी लेल सेहो आदर्श रूपमे जीवंत रहताह। राम सन आदर्श एहि संसारमे कोनो आन नहि अछि। ओ अपन मर्यादित चरित्रक माध्यमसँ साबित कयलनि जे ओ मर्यादा पुरुषोतम छथि। मणिकांत झा कहलनि जे भगवान राम भले दुनिया लेल भगवान होथु मुदा मिथिलामे हुनका दुलरुआ पाहुनक दर्जा हासिल छनि। मनीष झा रघु केर संचालनमे अनहरोख राति धरि चलल कार्यक्रममे विद्यापति सेवा संस्थानक मीडिया संयोजक प्रवीण कुमार झा, समाजसेवी मानव झा, छात्र नेता दीपक कुमार झा, समाजसेवी अशोक चौधरी, सुशील झा, श्रीकांत चौधरी, अरुण कुमार झा, शंभू झा आदिक उल्लेखनीय उपस्थिति रहल।
