दिन-देखार बिहारक आरा रेलवे स्टेशन पर ट्रेनमे डकैती

हिमगिरि एक्सप्रेसक एसी कोचमे भेल लूट
*
पटना
*

बिहारक आरा रेलवे स्टेशन पर बुधदिन हावड़ा-जम्मू तवी हिमगिरी एक्सप्रेसक एसी डिब्बाकेँ लुटेरासभक एकटा गिरोह निशाना बनओलक आ यात्रीसभसँ नगदी, गहना आ मोबाइल फोन लूटि लेलक। ई घटना दिनदेखारेमे भेल, जीआरपीक जवान आ टीटीई कोचक भीतर उपस्थित छल, मुदा ओ सभ किछु नहिं कयलक। घटनाक बाद लुटेरा बिहिया आ बक्सर रेलवे स्टेशनक बीच चेन खींचि ट्रेनकेँ रोकि कूदि भागि गेल। पीड़ित लोकनि एकटा वियाहक वरियातीक हिस्सा छलाह जे हिमगिरी एक्सप्रेसक बी१ एसी३ डिब्बामे यात्रा कऽ रहल छलैथ। बक्सरक एकटा जीआरपी अधिकारी कहलनि, “जाञ्चक क्रममे पता चलल जे किछु लुटेरा पटना रेलवे स्टेशनपर चढ़ल छल। ओ सभ डकैतीक लेल बारातीकेँ निशाना बनौलक। जखन ट्रेन आरा रेलवे स्टेशन पहुँचल तखन गिरोहक किछु सदस्य सेहो ट्रेनमे चढ़ि लूटपाट शुरू कऽ देलक। हुनका लग लोहा के छड़ आ हथियार छल। ओ सभ किछु यात्रीपर बेरहमीसँ हमला कयलक आ जबरदस्ती नगदी, गहना आ कतेको मोबाइल फोन आ दूटा सूटकेस छीन लेलक। “डकैतीक बाद पीड़ित लोकनि जीआरपी आ टीटीईसँ शिकायत कयलक, मुदा कोनो प्रतिउत्तर नहिं देल गेल आ ट्रेनकेँ बक्सर रेलवे स्टेशन पहुँचला पर प्राथमिकी दर्ज कराबय लेल कहल गेल।