अयोध्याक भव्य राम मन्दिरमे पूजा करबाक लेल भक्तलोकनिक बीच आरएसएसक संगठन ‘मुस्लिम राष्ट्रीय मंच’सँ जुड़ल ३५० लोक १५० किलोमीटर पैदल चलि एतय पहुँचलाह आ रामललाक दर्शन कयलनि। मुस्लिम राष्ट्रीय मंच (एमआरएम) केर ई दल २५ जनवरीकेँ लखनऊसँ पैदल चलल छल आ २५ किलोमीटरक दैनिक पदयात्रा कयलाक बाद मंगलदिन एतय पहुँचल।
सङ्गठनक मीडिया प्रभारी शाहिद सईद कहलनि जे दर्शनक क्रममे हुनकालोकनिक आँखिमे “गर्वक नोर” आ जीभपर ‘जय श्री राम’ छल। दलक नेतृत्व मंचक संयोजक राजा रईस आ प्रांतीय संयोजक शेर अली खान कयने छलाह। दर्शनक बाद भक्त लोकनि कहलनि जे श्रीरामक आध्यात्मिक दर्शनक ई क्षण आजीवन सुखद स्मृतिक रूपमे रहत। मंचक संयोजक राजा रईस कहलनि, “राम हमर सबहक पूर्वज छलाह, छथि आ रहताह। “एमआरएमक मानब छनि जे हमर देश, हमर सभ्यता, हमर संविधान हमरासभकेँ एक दोसरसँ दुश्मनी नहिं रखबाक शिक्षा दैत अछि। जँ कोनो व्यक्ति दोसर धर्मक पूजा स्थलमे जाइत अछि तँ ई नहिं मानल जेबाक चाही जे ओ अपन धर्म छोड़ि देलक अछि। की दोसरक सुखमे भाग लेनाइ अपराध अछि ? मंचक मानब छनि जे जँ ई अपराध अछि तखन प्रत्येक भारतीयकेँ ई अपराध करबाक चाही।”
