राजदमे बयानबाजी तेज, भाई वीरेंद्रक मुख्य प्रवक्तापर परोक्ष हमला
पटना । समदिया
बिहारक प्रमुख विपक्षी दल राजदमे आंतरिक बयानबाजी आब खुलिकऽ सामने आबि रहल अछि। मनेरसँ राजद विधायक भाई वीरेंद्र पार्टीक मुख्य प्रवक्ता शक्ति यादवक नाम लेने बिना हुनकापर तीक्षण हमला कयलनि। ओ कहलनि जे, “खामोश… जखनि अहाँक राजनीतिमे पैदाइशो नहि भेल छल, तखनिसँ हम सक्रिय राजनीति कऽ रहल छी।”
भाई वीरेंद्र आरोप लगबैत कहलनि जे ओ मात्र तेजस्वी यादवकेँ मुख्यमंत्री बनेबाक उद्देश्यसँ राजनीति करैत छथि, मुदा किछु लोक तेजस्वी यादवक नामक उपयोग कऽ अपन स्वार्थ साधि रहल छथि। ओ चेतौनी दैत कहलनि जे, जँ आवश्यक भेल तँ संबंधित व्यक्तिक “कच्चा चिट्ठा” सार्वजनिक कऽ देब, जाहिसँ ओ लोकसभमे मुँह देखेबाक योग्य नहि रहत।
ई विवाद ओहि बयानक बाद आर बढ़ल, जाहिमे भाई वीरेंद्र कहने छलाह जे तेजस्वी यादवक आसपाससँ “चमचा” सभकेँ हटाओल जाए। एकर जवाबमे पार्टीक मुख्य प्रवक्ता शक्ति यादव पूछने छलाह जे भाई वीरेंद्र बताबथि जे पार्टी लेल हुनकर योगदान की रहल अछि। एहि प्रश्नपर भाई वीरेंद्र कड़ा प्रतिक्रिया देलनि आ फेरसँ अपन पुरान राजनीतिक अनुभवक उल्लेख कयलनि।
भाई वीरेंद्र एहि क्रममे ईहो कहलनि जे ओ केवल लालू प्रसाद यादव आ तेजस्वी यादवक नेतृत्वमे विश्वास राखैत छथि आ ककरो व्यक्तिगत एजेंडासँ हुनकर कोनो संबंध नहि अछि। ओ संबंधित व्यक्तिकेँ “हैसियतमे रहबाक” सलाह दैत कहलनि जे हुनकासँ जुड़ल बहुतो बात हुनक जानकारीमे अछि।
उल्लेखनीय अछि जे हालहि मे भाई वीरेंद्रक एकटा कथित ऑडियो आ वीडियो सेहो चर्चामे रहल, जाहिमे पंचायत सचिवक संग हुनकर तीक्षण बहस देखल गेल छल। एहि घटनाक बाद पंचायत सचिव विधायकक विरुद्ध थाना मे शिकायत दर्ज करौने छलाह।
