संसदमे नीट पर चर्चाक दौरान राहुल गांधी कटाक्ष करैत शिक्षा मंत्री धर्मेंद्र प्रधान पर हमला कयलनि। ओ कहलखिन कि “शिक्षा मंत्री अपनाकेँ छोड़ि सबकेँ दोषी ठहरेलनि। पूरा देशक समक्ष ई स्पष्ट अछि जे हमर परीक्षा प्रणालीमे बहुत गंभीर समस्या अछि। खाली नीटमे नहिं अपितु सभ पैघ परीक्षामे गड़बड़ी होइत अछि। मंत्री (धर्मेन्द्र प्रधान) अपनाकेँ छोड़ि सबकेँ दोष देलखिन। हमरा नहि लगैत अछि जे ओ एतय जे भऽ रहल अछि ओकर मूल सिद्धान्तकेँ सेहो बुझैत छथि।”
राहुल भारतीय परीक्षा प्रणालीक अखंडता पर चिन्ता व्यक्त करैत दावा कयलनि जे लाखों छात्र एकरा धोखाधड़ी मानैत छथि। “लाखो लोकक मानब छनि जे जँ अहाँ अमीर छी आ अहाँ लग पैसा अछि तँ अहाँ भारतीय परीक्षा प्रणाली कीनि सकैत छी आ विपक्ष सेहो वैऽह भावना साझा करैत अछि। ओ एहि मामिला पर अलगसँ एक दिवसीय चर्चाक माँग कयलनि।
प्रधान यद्यपि राहुलक आरोपक खण्डन करैत कहलनि जे पछिला सात सालमे पेपर लीकक कोनो प्रमाण नहिं भेटल अछि। ओ कहलनि जे ई मामिला आब सर्वोच्च न्यायालयमे अछि आ राष्ट्रीय परीक्षण एजेंसी (एनटीए)क अन्तर्गत २४० सँ बेसी परीक्षा सफलतापूर्वक आयोजित कयल गेल अछि।
सरकारकेँ घेरबाक प्रयासमे गाँधी पूछलनि, “चूँकि ई (नीट) एकटा व्यवस्थित मुद्दा अछि, तेँ अहाँ एहि मुद्दाकेँ ठीक करबाक लेल वास्तवमे की कऽ रहल छी ?” प्रधान ताहि पर तीक्षण प्रतिक्रिया दैत कहलनि, ” मात्र चिचियेलासँ झूठ सच नहिं भऽ जाइछ, ई तथ्य जे प्रतिपक्षक नेता कहैत छथि जे देशक परीक्षा प्रणाली बकवास अछि, बहुत निन्दनीय अछि।” ई बहस तखन आओर विवादास्पद भऽ गेल जखन समाजवादी पार्टीक सांसद अखिलेश यादव एहि मुद्दा पर बहसमे शामिल भेलाह आ एहि मुद्दासँ निपटबाक सरकारक आलोचना कयलनि।
यादव कहलनि, “ई सरकार पेपर लीकक रिकॉर्ड बनओत। किछु एहन केंद्र अछि जतय २००० सँ बेसी छात्र पास भेल अछि। जाबत ई मंत्री (शिक्षा मंत्री धर्मेन्द्र प्रधान) छथि, छात्र सभकेँ न्याय नहिं भेटत।”
