बांग्लादेशक संसदीय चुनावमे प्रधानमन्त्री शेख हसीना भारी बहुमत प्राप्त कयलनि अछि। आब ओ चारिम बेर देशक प्रधानमंत्री बनय जा रहल छथि। हुनकर पार्टी अवामी लीग लगातार चारिम बेर जीतल अछि। मीडिया एकटा चुनाव अधिकारी के हवाला सँ ई खबरि देलक अछि।
रिपोर्टक अनुसार, हिंसासँ भरल चुनाव अभियान आ मुख्य विपक्षी दल बांग्लादेश नेशनलिस्ट पार्टी (बीएनपी) द्वारा बहिष्कारक बाद कतेको मीडिया रिपोर्टमे पुष्टि भेल अछि जे हसीनाक पार्टी २९९ सीटमेसँ २१६ सीट जितलक।
“सत्तारूढ़ अवामी लीग पार्टी ५० प्रतिशतसँ बेसी सीट जीत चुकल अछि। “
चुनाव आयोगक सोमदिन देर राति मतदानक परिणामपर अंतिम आधिकारिक घोषणा करबाक आशा अछि।
मुख्य निर्वाचन आयुक्त काजी हबीबुल अवलक अनुसार, कुल पात्र १२ करोड़ लोकमे सँ लगभग ४० प्रतिशत मतदान कयलनि।
निर्दलीय उम्मीदवार ५२ सीट जीतलनि, जखन कि देशक तेसर सबसँ पैघ जातीय पार्टी ११ टा सीट जीतलक।
हसीनाक पार्टी बहुमतक आंकड़ा पार कऽ चुकल अछि आ गिनती एखनो जारी अछि। बांग्लादेशक प्रधानमन्त्रीक रूपमे ई हुनकर पाँचम कार्यकाल होयत।
हसीनाक सरकार चुनावसँ पहिने हजारो प्रतिद्वंद्वी राजनेताकेँ गिरफ्तार कयलक। पूर्व प्रधानमन्त्री खालिदा जियाक नेतृत्वमे विपक्षी बीएनपी चुनावक बहिष्कार कयलक।
७८ वर्षीय जिया भ्रष्टाचारक मामिलामे दोषी ठहरलाक बाद नजरबंद छथि।
एम्हर प्रधानमंत्री हसीना गोपालगंज-३ निर्वाचन क्षेत्रसँ पुनः संसदक लेल चुनल गेलीह।
हसीनाकेँ २,४९,९६५ वोट भेटलनि जखन कि हुनकर निकटतम प्रतिद्वंद्वी बांग्लादेश सुप्रीम पार्टीक एम. निजाम उद्दीन लस्करकेँ मात्र ४६९ वोट भेटलनि।
