प्रधानमंत्री नरेन्द्र मोदी ९ आ १० अक्टूबरकेँ लन्दनमे आयोजित होबयवला न्यायविद आ लेखकसभक अन्तर्राष्ट्रीय सम्मेलनक आयोजकसभकेँ पत्र लिखलनि अछि। ओ लिखलनि, “उज्जवल भविष्यक लेल वैश्विक शान्ति आवश्यक अछि। हमर सामूहिक प्रयासक सफलता राष्ट्र आ समुदायक बीच एकता आ सहयोग पर निर्भर करैत अछि।”
सम्मेलनक आयोजक वरिष्ठ अधिवक्ता आ इंटरनेशनल काउंसिल ऑफ जुरिडियन एंड इंटरनेशनल राइटर्स कमीशनक अध्यक्ष आदिश सी अग्रवालकेँ लिखल पत्रमे मोदी लिखलनि जे उज्जवल भविष्यक लेल वैश्विक शान्ति मौलिक अछि। हमर साझा प्रयास एकता पर निर्भर अछि। ओ भगवान बुद्ध आ महात्मा गाँधीसँ प्रेरणा लऽ शान्तिक लेल भारतक ऐतिहासिक प्रतिबद्धतापर प्रकाश देलनि। वैश्विक शान्ति आ समृद्धिकेँ बढ़ावा देबयवला नीतिसभकेँ आकार देबाक लेल मुख्य न्यायाधीश, मन्त्री, संसद सदस्य, बार नेता, लेखक, सम्पादक आ विधि शिक्षकसभक सामूहिक विशेषज्ञता महत्वपूर्ण अछि।
प्रधानमंत्री लिखलनि जे नव संघर्ष राष्ट्रक सामाजिक आ आर्थिक स्थिरताक लेल खतरा उत्पन्न करैत अछि। एहि चुनौतिसभक समाधान केवल वैश्विक कारवाई आ जनतासँ जनताक जुड़ावक माध्यमसँ प्रभावी रूपसँ कयल जा सकैत अछि। भारत एक पृथ्वी, एक परिवार, एक भविष्यक दर्शनसँ प्रेरित आ वैश्विक शान्ति, एकता आ भाईचाराकेँ बढ़ावा देबाक लेल समर्पित अछि। एकर उद्देश्य भावी पीढ़ीक लेल एकटा शांतिपूर्ण दुनियाक निर्माण करब अछि।
ओ कहलनि जे सम्मेलनमे आयोजित होबयवला चर्चा शान्ति, सद्भाव आ कल्याणक लेल एकटा दूरदर्शी रूपरेखा तैयार करत। ओ प्रतिभागीसभकेँ अपन विचार-विमर्शमे सफलताक कामना कयलनि आ वैश्विक शान्तिकेँ बढ़ावा देबामे हुनक सामूहिक प्रयासक महत्वपर प्रकाश देलनि। ई शिखर सम्मेलन ९ आ १० अक्टूबरकेँ लन्दनमे आयोजित होयत। लेखक आ न्यायविद एहिमे भाग लेताह।
