दरभंगा-अयोध्या धाम जंक्शन-आनंद विहार टर्मिनल आ मालदा टाउन-सर एम. विश्वेश्वरैया टर्मिनस (बेंगलुरु) केर बीच दूटा नव अमृत भारत ट्रेन देशवासीकेँ उपहार भेटत। प्रधानमंत्री नरेन्द्र मोदी ३० दिसम्बरकेँ अयोध्याक नव स्टेशनक उद्घाटन एहि दूटा नव ट्रेन आ देशवासीक लेल ६ टा आओर वन्दे भारत ट्रेनक सङ्ग करताह।
अमृत कालमे देशवासी लेल अमृत भारत ट्रेन एकटा नव उपहार होयत।
भारतीय रेलवे इंटरसिटी यात्राक लेल सुपरफास्ट एक्सप्रेस सेवा अमृत भारत एक्सप्रेस शुरू करबाक लेल तैयार अछि। देशमे रेल यात्राक आधुनिकीकरणक दिशामे ई एकटा महत्वपूर्ण डेग अछि। ई ट्रेन यात्रीसभकेँ गति, दक्षता, आराम आ सामर्थ्यक अद्वितीय मिश्रण प्रदान करत। पहिल चरणमे दूटा नव ट्रेन शुरू कयल जा रहल अछि। एहिमे अयोध्या धाम जंक्शन दरभंगा आ मालदा टाउन – बेंगलुरु सम्मिलित अछि।
एहि ट्रेनसभमे सभ तरहक अत्याधुनिक सुविधा होयत जकर लाभ लोक उठा सकैत छथि। अमृत भारत एक्सप्रेस ट्रेनमे स्टेशनपर लोकोमोटिव बदलबाक आवश्यकताकेँ समाप्त करबाक लेल आगू आ पाछूक छोर (पुश-पुल कॉन्फ़िगरेशन) पर दूटा डब्ल्यूएपी-५ इंजनक उपयोग कयल गेल अछि जाहिसँ यात्राक समय कम भऽ गेल अछि।
अमृत भारत एक्सप्रेसमे २२टा गैर-वातानुकूलित डिब्बाक सङ्ग २टा द्वितीय श्रेणीक लगेज ट्रैक (एसएलआरडी), ८टा सामान्य बैसबाक डिब्बा (जीएस) आ १२टा स्लीपर क्लास कोच (एससीएन) अछि।
पैघ शहर आ छोट शहरक बीच यात्राक माँगकेँ पूरा करबाक लेल एहि ट्रेनसभकेँ दिन-रात्रि एक्सप्रेस सेवाक रूपमे संचालित करबाक योजना बनाओल गेल अछि। अमृत एक्सप्रेसमे मेक इन इंडियाक छाप पूरा देखल जायत। पुश-पुल लोकोमोटिवक निर्माण चित्तरंजन लोकोमोटिव वर्क्स (सीएलडब्ल्यू) चित्तरंजनमे कयल जा रहल अछि जे भारतक सबसँ पैघ लोकोमोटिव निर्माण इकाइमेसँ एक अछि आ डिब्बाक उत्पादन दुनियाक सबसँ पैघ रेलवे यात्री रोलिंग स्टॉक निर्माता, इंटीग्रल कोच फैक्ट्री (आईसीएफ), चेन्नई द्वारा कयल जा रहल अछि।
अमृत भारत एक्सप्रेसक इंटीरियरमे फोल्ड होबयवाला स्नैक टेबल, उपयुक्त होल्डरक संग मोबाइल चार्जर, फोल्डेबल बोतल होल्डर, सौंदर्यपूर्ण रूपसँ मनभावन आ एर्गोनोमिक रूपसँ डिजाइन कयल गेल सीट आ बर्थ, बेहतर सामानक टैक, रेडियम रोशनी फ्लोटिंग पट्टीक संग अत्याधुनिक अछि। एफडीबीकेँ एक कातमे स्थानांतरित कय खोलबा योग्य दर्पण फ्रेमक पाछाँ राखल गेल अछि।
