प्रशांत किशोर मंगल दिन एकटा बयान जारी केलखिन। ओ कहलनि जे नीतीश कुमारक राजनीति करबाक तरीका ई अछि जे, जे हुनका संग रहैत छथि ओ सदैव हुनका डराबैत रहैत छथि।
बिहारक मुख्यमंत्री नीतीश कुमार मंगल दिन (२३ जनवरी) राज्यपालसँ भेंट कयलनि आ हुनक बैसारसँ बिहारक राजनीतिक गलियारामे हड़कंप मचि गेल। चुनाव रणनीतिकार आ जन सुराज सूत्रधार प्रशांत किशोर आब एहि बैसार पर प्रतिक्रिया देलनि अछि। पीके कहलनि जे २०२४ केर लोकसभा परिणामक बाद नीतीश कुमार कोन दिशामे जयताह ई पृथ्वी पर कियो नहिं बता सकैत अछि, नीतीश कुमार अपनो नहिं बता सकैत छथि।
जन सूरज पदयात्राक सूत्रधार प्रशांत किशोर एकटा बयान जारी करैत नीतीश कुमार पर आक्रमण करैत कहलनि जे किछु दिन पहिने कोआर्डिनेशन कमेटीक बैसार भेल छल ओहिमे हुनक पार्टी अध्यक्ष ललन सिंह नहिं गेलाह, कोनो दोसर व्यक्तिकेँ ओ पठेलनि।
एहन नहिं अछि जे नीतीश कुमार काल्हि भाजपामे जा रहल छथि। नीतीश कुमारक राजनीतिक ई तरीका अछि, जे हुनका संग रहैत छथि, हुनका सदैव डराबैत रहैत छथि जे, जँ अहाँ हमरा पर ध्यान नहिं देब तऽ हम ओतय जा सकैत छी।
प्रशांत किशोर कहलनि जे नीतीश कुमार काल्हि प्रेस कॉन्फ्रेंस कए कहताह जे हमर अंतरात्मा कहि रहल अछि जे आब ओ एहि लोकक संग नहिं रहताह। सभ कियो एक संग नहिं भेल, हम कहलहुं जे सबके एकजुट हेबाक चाही, जँ ई नहिं भेल तखन आब की करब ? आब ओ फेरसँ भाजपामे जा रहल छथि। नीतीश कुमार एहि तरहक राजनीति करैत रहैत छथि। हम अहांकेँ रोज कहैत छी जे हमरा नहिं लगैत अछि जे ओ लोकसभाक पहिने चलि जाएत। ओ लोकसभा तक रहताह।
पीके कहलनि जे ओ महागठबंधन किएक बनौने छथि, पहिने ई बुझू। नीतीश कुमार मार्चमे दिल्ली अयलाह आ अगस्तमे महागठबंधन बनयबासँ पहिने घंटो धरि हमरा संग बैसल रहलाह। पटनामे सेहो हमसभ भेंट केलहुं, ओ राजद केर संग मात्र एहि लेल गेलाह कि हुनकर दिमागमे इ बात आबि गेल छल जे २०२४ केर लोकसभा चुनावक बाद जँ देशमे भारतीय जनता पार्टी जीतत तऽ ओ हमरा सबकेँ हटा कय अपन मुख्यमंत्री बना लेत। जेडीयू केर ४२ आ भाजपाक ७५ विधायक अछि, तऽ एही डरसँ ई सोचलाह जे बीजेपी हमरा हटाबय, ताहिसँ पहिने हम स्वयं महागठबंधन बना लैत छी, कमसँ कम २०२५ तक कुर्सी बाँचल रहत। नीतीश कुमारकेँ अपन जे सहूलियत हेतनि, जाहिमे हुनका अपन स्वार्थ देखायत, ओहि दिशामे ओ जयताह।
