प्राण प्रतिष्ठा दिन (२२-०१-२०२४) मिथिलाक्षरमे मैथिली रामायण लिखताह मिथिलाक्षर साक्षरता अभियानी

चन्दा झा कृत मैथिली रामायण हजारो अभियानी द्वारा एक्कहि दिनमे लिखि होयत पोस्ट

*

कार्यालय समदिया मधुबनी

*

भगवान रामक घरवास पर जानकीक नैहर जन्मभूमि मिथिलाक वासीगणमे सेहो अद्भुत उत्साह अछि आ एकरा किछु विशेष ढंगसँ प्रस्तुत करय लेल मिथिलाक्षर साक्षरता अभियानी सम्पूर्ण मैथिली रामायण मिथिलाक्षरमे प्राण प्रतिष्ठाक दिन अर्थात २२-०१-२०२४ केँ लिखि सिया-रामकेँ समर्पित करय केर निश्चय कयलनि। प्राण प्रतिष्ठा वाला दिन चन्दा झा कृत मैथिली रामायण एक्कहि दिनमे हजारो अभियानी मिलि क्रमशः शोसल मिडियाक प्लेटफार्म पर पोस्ट करथिन, जे कि फेसबुकक ‘मिथिलाक्षर साक्षरता अभियान’ समूह, ‘मैथिल पुनर्जागरण प्रकाश (राष्ट्रीय मैथिली दैनिक) समूह आ एक्स आदि विभिन्न प्लेटफार्म पर पोस्ट होयत।

मिथिलाक्षर साक्षरता अभियानक संरक्षक देवेन्द्र झा आ संरक्षक दीपक कुमार झा एवं संरक्षक प्रदीप कुमार एकर संयोजन कय रहल छथि जखनि कि संरक्षिका रुनू मिश्रा, संरक्षक कृष्ण कान्त झा, संरक्षक धर्मेन्द्र कुमार झा, संरक्षक प्रवीण झा, संरक्षिका प्रेमलता झा, संरक्षिका माधुरी झा आदि अनेक एकर मार्गदर्शन कय रहल छथि।

मैपुप्र समदिया जखनि प्रश्न कयलक जे एक दिनमे ओहो मिथिलाक्षरमे सम्पूर्ण रामायण कोना लिखायत तऽ संयोजक देवेन्द्र झा बतेलनि जे, जहिना एखनि समस्त देशवासी राममय अछि तहिना एक डेग आगू समस्त मिथिलावासी मिथिलाक्षरमय सेहो छथि। किछु साल पुर्व तक मिथिलाक्षर लुप्तप्राय अवश्य भेल छल, मुदा मिथिलाक्षर साक्षरता अभियानक सद्प्रयाससँ आइ मिथिलाक्षर लाखों मिथिलावसीक पहुँचमे अछि आ प्रायः व्यवहार पथ पर अछि। मिथिलाक्षर साक्षरता अभियानक संस्थापक अजय नाथ झा शास्त्री’क परिकल्पना ‘सिखू आ सिखाउ’ आइ विशाल वटवृक्षक निर्माण कय चुकल अछि, एकर कतेको शाखा मिथिलाक्षर सिखबय केर अभियान पथ पर अछि आ मिथिलाक्षर साक्षरता अभियान एकटा मिथिलाक्षर सिखबय केर विश्वविद्यालयक रुप लय लेने अछि। जहाँ तक एक्कहि दिनमे सम्पूर्ण मैथिली रामायण लिखय केर प्रश्न अछि, तऽ एहि तरहक ऐतिहासिक उपलब्धि पहिने सेहो मिथिलाक्षर साक्षरता अभियान कय चुकल अछि। कोरोना कालमे गोस्वामी तुलसीदास कृत श्रीरामचरितमानस एक्कहि दिनमे लिखि चुकल छथि मिथिलाक्षर साक्षरता अभियानीगण। आ एहि बेर श्रीरामक घरवास पर सम्पूर्ण मैथिली रामायण मिथिलाक्षरमे लिखि समर्पित करब।

विदित होय कि मिथिलाक्षर साक्षरता अभियानक देश-विदेशमे धरातलीय कार्यशालाक संग-संग ह्वाट्सएप केर माध्यमस़ँ ५५ टा आनलाईन विद्यालय चलैत अछि आ धरातल मिथिला ओ देशक नगर-महानगरक मिथिलावासीक संग-संग प्रायः २१ देशमे रहयवाला मिथिलावासी जुड़ल छथि, मिथिलाक्षर सिखि, सिखा रहल छथि, एखनि तक लगभग तिन सय केर करीब बैच निकलि चुकल अछि, छः हजार गोटे मिथिलाक्षर प्रवीण भऽ कऽ मिथिलाक्षर सिखा रहल छथि, लाखों मिथिलावसी तक एकर पहुंच भऽ चुकल अछि, मिथिलावासीक लेखनीक प्रथम रुचि पुनः मिथिलाक्षर बनय से संकल्प छैक।