बिहारक पूर्व मुख्यमंत्री आ हिन्दुस्तानी अवाम मोर्चाक सुप्रीमो जीतन राम मांझी इंडिया गठबंधनक विषयमे पैघ दावा कयलनि अछि। कहलनि जे खरमासक बाद नीतीश कुमार एकटा पैघ निर्णय लेबय जा रहल छथि। ओ लालू यादव आ महागठबंधनक दलकेँ कखनो पलटी मारि झटका दऽ सकैत छथि। पूर्व मुख्यमंत्री पहिनेसँ दावा कऽ चुकल छथि जे एनडीएमे जयबाक अतिरिक्त हुनका लग कोनो सुरक्षित समाधान नहि अछि।
गयामे मीडियासँ बातचीत करैत पूर्व मुख्यमंत्री कहलनि जे नीतीश कुमार भाजपाक आह्वानक प्रतीक्षा कऽ रहल छथि। जँ भाजपा हुनका आइ फोन करैत अछि तँ ओ हुनका सङ्ग जयबाक लेल तैयार रहताह। पूर्व मुख्यमंत्री पुरान बात केर सेहो याद दियेलनि। कहलनि “नीतीश कुमार पहिने एनडीए गठबंधनमे शामिल भऽ बिहारक मुख्यमंत्री छलाह। फेर नरेन्द्र मोदीक बहाना बना एनडीए छोड़ि महागठबंधनमे चलि गेलाह। मुदा ओइठाम सेहो बेसी दिन नहिं रहि सकलाह। २०१६ मे ओ अपन पार्टी जेडीयूक राष्ट्रीय अध्यक्ष बनलाह आ पार्टीक कमान सम्हारलनि। पुनः २०१७ मे तेजस्वी यादव पर आरोपपत्रक बहन्ने महागठबंधन छोड़ि देलनि। ओ पुनः भाजपाक सङ्ग एनडीएममे शामिल भेलाह आ मुख्यमन्त्री बनलाह। आइ सेहो वैह स्थिति सोझाँ आबि गेल अछि। लालू प्रसाद यादव, तेजस्वी यादव आ हुनक परिवारक कतेको सदस्य लैंड फॉर जॉब घोटाला मामलामे आरोपी छथि। नीतीश कुमारकेँ भ्रष्टाचारमे अपन उप-मुख्यमंत्रीक नाम आबयसँ परेशानी भऽ रहल अछि।
मांझी कहलनि जे नीतीशजी पर लालू प्रसाद यादवक दबाव अछि। राजदक नेता-मंत्री अक्सर पूछैत रहैत छथि जे नीतीश कुमार बिहारक कमान तेजस्वीकेँ कहिया सौंपताह। नीतीश कुमारकेँ जेडीयूक राष्ट्रीय अध्यक्ष बनलाक बाद विधानसभाक अध्यक्ष लालू यादवसँ भेंट करबाक लेल हुनक निवास पहुँचल छलैर। नीतीश कुमारकेँ एहि बातक भान अछि जे लालू खेमाक मंशा की अछि। मुदा ओ कोनो परिस्थितिमे अपन मुख्यमंत्री पद नहिं छोड़य जा रहल छथि। एहनमे इहो विकल्प अछि जे १४ जनवरीक बाद भरिसक ओ पलटी मारताह अथवा विधानसभा भंग कऽ देताह।
