प्रधानमंत्री नरेन्द्र मोदी सोमदिन रूस आ ऑस्ट्रियाक तीन दिवसीय आधिकारिक यात्रापर प्रस्थान कयलनि। अपन यात्राक जानकारी दैत पीएम मोदी एक्स पर कहलनि जे अगिला तीन दिन हम रूस आ ऑस्ट्रियामे रहब। ई यात्रा एहि देशसभक सङ्ग सम्बन्धकेँ आओर मजबूत करबाक एकटा उत्कृष्ट अवसर होयत जिनका सङ्ग भारतक कतेको सदीक पुरान मित्रता अछि। हम एतय रहय बला भारतीय समुदायक संग बातचीत करबाक लेल सेहो उत्सुक छी।
बतबैत चली जे प्रधानमंत्री मोदी ८-९ जुलाईकेँ मास्कोक यात्रा पर रहताह। एहि दौरान ओ मास्कोमे २२म भारत-रूस वार्षिक शिखर सम्मेलनमे भाग लेताह। एकर बाद पीएम मोदी ९ जुलाईकेँ ऑस्ट्रिया जयताह। ऑस्ट्रियामे ओ ऑस्ट्रियाक चांसलर कार्ल नेहमरक सङ्ग वार्ता करताह।
ओतहि मास्कोमे पुतिनक सङ्ग प्रधानमंत्री मोदीक बैसारसँ पहिने विदेश मंत्री एस जयशंकर कहलनि जे दुनू देशक बीच आर्थिक सम्बन्धमे बेस सुधार भेल अछि। रूसक संग संबंधमे ई सबसँ पैघ बदलाव अछि। ओ कहलनि जे प्रधानमंत्री नरेन्द्र मोदी आ रूसक राष्ट्रपति पुतिनक लेल बैसबाक आ सम्बन्धपर चर्चा करबाक ई एकटा नीक अवसर होयत।
जनतब जे राष्ट्रपति व्लादिमीर पुतिन पीएम मोदीक लेल एकटा निजी रात्रिभोजक आयोजन करताह। प्रधानमन्त्रीक यात्राक विवरण दैत विदेश सचिव विनय क्वात्रा कहलनि जे २०२२मे उज्बेकिस्तानक समरकंदमे हुनक अनौपचारिक बैसारक बादसँ दुनू नेताक बीच लगातार फोन कॉल भऽ रहल अछि। ओ कहलनि जे भारत आ रूसक बीच सम्बन्धक सम्पूर्ण पहलू पर व्यापक समीक्षा चर्चा होयत।