प्रधानमंत्री नरेन्द्र मोदी सोमदिन अमेरिकाक पूर्व राष्ट्रपति जिमी कार्टरक निधनपर शोक व्यक्त कयलनि। १०० वर्षक अवस्थामे कार्टरक रविदिन निधन भऽ गेल।
प्रधानमंत्री मोदी एक्स पर लिखलनि, “अमेरिकाक पूर्व राष्ट्रपति जिमी कार्टरक निधनसँ बहुत दुखी छी। ओ एकटा महान दूरदर्शी राजनेता छलाह, जे वैश्विक शान्ति आ सद्भावक लेल अथक प्रयास कयलनि।”
पीएम मोदी आगू लिखलनि, “भारत-अमेरिका सम्बन्धकेँ मजबूत करबामे हुनक योगदान एकटा स्थायी विरासत छोड़ि गेल अछि। हुनकर परिवार, मित्र आ अमेरिकाक लोकक प्रति हमर हार्दिक संवेदना अछि।”
कार्टरक निधन रविदिन १०० वर्षक आयुमे ‘प्लेन्स’ जॉर्जिया स्थिति अपन घरमे भऽ गेलनि। ओ अमेरिकी इतिहासमे सबसँ बेसी समय धरि जीवित रहनिहार पूर्व राष्ट्रपति छलाह। अक्टूबरमे ओ अपन १००म जन्मदिन मनौलनि।
जिमी कार्टर, जे १९७७ सँ १९८१ धरि अमेरिकाक ३९म राष्ट्रपति छलाह, इजरायल आ मिस्रक बीच कैम्प डेविड समझौता सन उपलब्धि प्राप्त कयने छथि, मुदा घरेलू स्तर पर मन्दी अर्थव्यवस्था, ईरानमे बंधक संकट आ अफगानिस्तान पर सोवियत आक्रमण एहेन मुद्दा छल जाहि लेल हुनका संघर्ष करय पड़ल।
कार्टर व्हाइट हाउसमे मात्र एक कार्यकाल पूरा कयलनि। १९८० केर अमेरिकी राष्ट्रपति चुनावमे हुनका रिपब्लिकन रोनाल्ड रेगनसँ करारी हारक सामना करय पड़ल।
यद्यपि, कार्टर राष्ट्रपतिक बाद एकटा असाधारण जीवन जीबैत छलाह आ २००२ मे शान्तिक लेल नोबेल पुरस्कार जीतलनि। पुरस्कार प्रशस्ति पत्रमे कहल गेल अछि, “अंतर्राष्ट्रीय संघर्षक शांतिपूर्ण समाधान तकबाक, लोकतंत्र आ मानवाधिकारकेँ आगू बढ़ाबय, आर्थिक आ सामाजिक विकासकेँ बढ़ावा देबाक लेल हुनकर दशकक अथक प्रयासक लेल।”
कार्टर १९५९मे ड्वाइट आइजनहावर आ १९६९मे रिचर्ड निक्सनक बाद भारतक दौरा करयवला तेसर अमेरिकी राष्ट्रपति छलाह।
१९७८मे एहि यात्रामे हुनक सङ्ग प्रथम महिला रोजलिन कार्टर सेहो छलाह, जिनकर बादमे ९६ वर्षक आयुमे नवम्बर २०२३मे निधन भऽ गेल।
