राजनीति ईडीक उद्देश्य मात्र हमरा बन्दी बनयाब, पूछताछ नहिं – केजरीवाल January 4, 2024 Maithil Punarjagran Prakash नई दिल्ली * मुख्यमंत्री अरविन्द केजरीवाल बृहस्पतिकेँ ईडीक नोटिसक जवाब दैत कहलनि जे भाजपा हुनका गिरफ्तार करय चाहैत अछि। “हमर सबसँ पैघ संपत्ति हमर ईमानदारी अछि। ई लोकसभ झूठ आरोप लगा कऽ आ झूठ सम्मन पठा कऽ हमरा बदनाम करय चाहैत अछि।” 3 जनवरी कऽ ईडी अरविंद केजरीवालकेँ शराब घोटालामे पूछताछक लेल तलब केने छल। मुख्यमंत्री कहलनि “वकीलसभ हमरा कहलनि जे ईडी द्वारा हमरा पठाओल गेल सम्मन अवैध अछि। ई सम्मन अवैध किएक अछि, हम ईडीकेँ एकर विस्तारसँ जवाब भेजने छी। मुदा ओ हमर एक्कौहटा प्रश्नक उत्तर नहिं देलनि। एकर अर्थ अछि जे हुनका लग हमर प्रश्नक उत्तर नहि अछि, आ ओ इहो मानैत छथि जे ई सम्मन अवैध अछि।” मुख्यमंत्री कहलनि, की हमरा एकटा गैरकानूनी नोटिसक पालन करय केर चाही ? “जँ कानूनी रूपसँ सही सम्मन अबैत अछि तँ हम ओकर पालन करब।” मुख्यमंत्री कहलनि कि हुनकर उद्देश्य जांच नहिं अछि। हुनकर उद्देश्य हमरा लोकसभा चुनावमे प्रचार करयसँ रोकब अछि। ओ कहलनि “एहि जाँच केर शुरू भेल दू साल भऽ गेल अछि मुदा आब हमरा लोकसभा चुनावसँ ठीक पहिने समन पठाओल गेल अछि। हुनकर उद्देश्य हमरासँ पूछताछ करब नहिं अछि, हुनकर उद्देश्य पूछताछक बहन्ने हमरा बजाकय बन्दी बनायब अछि, जाहिसँ हम लोकसभा चुनावमे प्रचार नहिं कऽ सकी।” दिल्लीक मुख्यमंत्री कहलनि ‘दिल्ली शराब घोटाला’, अहाँ पिछला २ सालमे ई शब्द कतेको बेर सुनने होयब। पछिला दू सालमे जांच एजेंसी कतेको बेर छापा मारलक आ कतेको लोककेँ गिरफ्तार कयलक। मुदा एखन धरि एको पाइक दुरूपयोग नहि भेटल अछि, कतहुसँ एको पाइ नहिं बरामद भेल अछि। आगू मुख्यमंत्री अरविन्द केजरीवाल कहलखिन जे जँ वास्तवमे भ्रष्टाचार भेल अछि तखन एतेक करोड़ रुपया कतऽ गेल ? ओ कहलनि जे सच्चाई ई अछि जे कोनो तरहक भ्रष्टाचार होइबे नहिं कयल, जँ होइत तऽ पाइ सेहो भेटैत। ओ कहलनि जे एहन फर्जी मामिलामे ओ आम आदमी पार्टीक कतेको नेताकेँ जेलमे रखलनि अछि, केकरो विरुद्ध कोनो सबूत नहिं अछि। आगा ओ कहलनि “आइ मनीष सिसोदिया, संजय सिंह आ विजय नायर जेलमे एहि लेल नहिं छथि जे ओ कोनो भ्रष्टाचार कयने छथि, बल्कि एहि लेल छथि, किएक कि ओ सभ भाजपामे जायसँ मना कय देलथि। मुख्यमंत्रीक कहब अछि, आइ हम भाजपासँ लड़बामे सक्षम एहि लेल छी किएक तँ हम कोनो भ्रष्टाचार नहिं कयने छी। आइ जे किछु चलि रहल अछि ओ बहुत खतरनाक अछि। ई लोकतंत्रक लेल बहुत गलत अछि। हमरा सबकेँ मिलि एकरा रोकय केर चाही। ओ कहलनि जे हमर तन, मन,धन देशक लेल अछि। Spread the love
