‘पातालसँ’ खोजि कऽ निकालब पवन खेड़ाकेँ, राहुल धरि पहुँचत केस’ : सीएम हिमंत
दिसपुर । समदिया
असमक मुख्यमंत्री हिमंत बिस्वा सरमा आ कांग्रेस नेता पवन खेड़ाक बीच छिड़ल जुबानी युद्ध आब एकटा बहुते गंभीर मोड़ पर आबि गेल अछि। मुख्यमंत्री सरमा अपन पत्नी पर लगाओल भ्रष्टाचारक आरोप पर पवन खेड़ाकेँ साफ चेतौनी देलनि। सरमा कहलनि जे जँ खेड़ा पातालमे जाइ कऽ नुका जेताह, तैयो असम पुलिस हुनका ओतऽसँ ताकि आनत।
ई पूरा विवाद तखनि शुरू भेल जखनि कांग्रेस नेता पवन खेड़ा मुख्यमंत्री सरमा केर पत्नी पर भ्रष्टाचारक गंभीर आरोप लगौलनि। ओ सरमाक पत्नी रिनिकी भुइयाँक खिलाफ किछु दस्तावेज सेहो पेश कयलनि। मुख्यमंत्रीक दावा अछि जे खेड़ा ई सब कांग्रेस नेता राहुल गांधीक इशारा पर कयलनि। सरमा कहलनि जे पवन खेड़ा जे ‘कागज’ पेश कयने छथि, से केवल राजनीतिसँ प्रेरित अछि आ एहि केर असली पटकथा राहुल गांधी लिखने छथि।
मुख्यमन्त्रीक चेतौनी मात्र शब्दमे सीमित नहि रहल। मंगल, यानी 7 अप्रैलकेँ असम पुलिसक एकटा टीम अचानक पवन खेड़ाक दिल्ली स्थित आवास पर पहुँचि गेल। पुलिसक एहि कारवाईसँ असमसँ लय दिल्ली धरि, राजनीतिक गलियारामे हलचल तेज भ’ गेल अछि। सरमा कहलनि जे पातालमे सेहो नुकायत तऽ हम उठा क’ ल’ आनब, यानी, पातालसँ सेहो खोजि क’ निकालब। एहि बयानसँ साफ अछि जे असम सरकार एहि मामिलामे कोनो ढ़ील देबाक मूडमे नहि अछि।
मुख्यमंत्री सरमा मात्र पवन खेड़ा पर निशाना नहि साधलन्हि, बल्कि सीधे राहुल गांधीकेँ सेहो एहि मामिलामे खींचि लेने छथि। ओ दावा कयलन्हि जे एहि सम्पूर्ण मामिलाक जाँचक दायरा बढ़त आ आबयवाला कालमे राहुल गांधीसँ सेहो एहि संबंधमे कड़ा पूछताछ भ’ सकैत अछि। असममे विधानसभा चुनावसँ पहिने राजनीतिक सरगर्मी आब अपन चरम पर अछि। जतय एक दिसि कांग्रेस एहिकेँ सत्ताक दुरुपयोग बताबैत अछि, ओतहि मुख्यमन्त्री सरमा एहिकेँ अपन निजी आ पारिवारिक प्रतिष्ठासँ जोड़ैत आर-पार केर लड़ाईक एलान क’ देने छथि।
