हंगामाक बीच संसदक मानसून सत्र शुरू, विपक्षी विरोधक बीच लोकसभा स्थगित
नई दिल्ली।समदिया
संसके मानसून सत्र सोमदिन खूब नारेबाजी आ हंगामाक बीच शुरू भेल। विपक्षी सांसद सदनक वेलमे घुसि कय सत्रक पहिल दिन नारा लगौलनि, जाहिसँ लोकसभाक कार्यवाही दुपहर धरि स्थगित भ गेल। लोकसभा अध्यक्ष ओम बिड़ला एहि कार्यवाहीक शुरुआत करैत दिवंगत सांसदकेँ श्रद्धांजलि देलनि। एकर तुरंत बाद विपक्षी बेंचसँ नारेबाजी आ हल्ला उठल, जाहिसँ सदनमे हंगामा पसरि गेल। सभापति ओम बिरला अपील करैत कहलनि जे संसद लोकतंत्रक सर्वोच्च मंच अछि आ सभकेँ बजबाक समय देल जायत। सभापतिक बेर-बेर आग्रहक बादो विपक्षी सदस्यक हंगामा जारी रहल। किछुए देर बाद सभापति ओम बिड़ला लोकसभाक कार्यवाही दुपहर धरि स्थगित कय देलनि।
एहिसँ पहिने प्रधानमंत्री नरेंद्र मोदी सभ सांसदकेँ सदनमे सक्रिय रूपसँ भाग लेबय लेल आमंत्रित कयने छलाह। कार्यवाही शुरू होयसँ पहिने अपन संबोधनमे पीएम मोदी कहलनि कि मानसून सत्र शुरू होय केर संग-संग देशक गति बढ़ि गेल अछि आ संसदक भावना ओहि गतिमे नव ऊर्जाक संचार कय सकैत अछि। राष्ट्रक लक्ष्यकेँ प्राप्तिक लेल सकारात्मक भावना अनिवार्य अछि।
ओ कहलनि जे, “हमर सदनमे बहुत अनुभवी सांसद छथि, चाहे ओ कोनो पार्टीसँ जुड़ल होथि। हुनका लग विशाल अनुभव छनि। एहि मोड़ पर देश आ संसदकेँ हुनकर अनुभव आ बुद्धिक जरूरत अछि। संसदक कामकाज, सार्थक चर्चा आ देशकेँ आगू बढ़ेबाक सामूहिक संकल्प समय केर मांग अछि।”
पीएम मोदी आगू कहलनि जे, “एस्पिरेशनसँ भरल देशक युवाक मांग अछि कि हम आगू बढ़ि। आई समयक मांग अछि कि राष्ट्रनिष्ठासँ भरल राष्ट्रभक्तिके लेल जीबि रहल आवाजकेँ सदनमे उचित मंच भेटैत रहय। ओ आवाजकेँ बुलंद करय आ देशकेँ दिशा दय।”
ओ कहलनि, “जतय तथ्य आ तर्क होयत अछि, ओतय तूफानक लेल जगह नहि होयत अछि। जँ तर्क मजबूत अछि तँ शांत चित्तसँ सेहो अपन आवाजकेँ बुलंद बनाओल जा सकैत अछि। हम आशा करैत छी कि तर्क आ तथ्यक संग सदनक चर्चाकेँ समृद्ध कयल जाय। सभ आवाजकेँ अवसर भेटय आ सभ विचारकेँ सम्मान भेटय, इ संसदक हमर भूमिका अछि।”
