एहि साल सरकारी केंद्र पर किसानक धान खरेदीक काज १ नवंबरसँ शुरू भेल अछि आ ई १५ फरवरी तक चलत। मुदा एखनि धरि धान खरेदीमे तेजी नहिं आयल अछि।
बिहारमे किसान धान बेचय लेल क्रय केंद्र तक नहि पहुंचि रहल छथि, जाहि कारण धान खरेदीक गति धीमा भऽ गेल अछि। कहल जा रहल अछि जे कतेको क्षेत्रमे धानक कटाई नहि भेल अछि आ राज्यमे पैक्स (प्राथमिक कृषि ऋण समिति) केर चुनाव चलि रहल अछि, जाहि कारण धान खरेदीमे तेजी नहि आयल अछि।
बिहारमे किसानक धान खरेदीक काज एहि साल १ नवंबरसँ शुरू भऽ गेल अछि आ ई १४ फरवरी तक चलत। एहि साल धान खरेदीक लक्ष्य ४५ लाख मीट्रिक टन निर्धारित कयल गेल अछि। एतय जँ आंकड़ा देखल जाय तऽ धान खरेदीक काज शुरू भेलाक एक पखवाड़ासँ बेसी समय बीत चुकल अछि, मुदा एखन धरि मात्र १५ हजार मीट्रिक टन धान खरीदल जा चुकल अछि।
मानल जाइत अछि जे धान खरेदीक गति नहि बढ़बाक कारण पैक्सक चयन आ दक्षिण बिहारमे धानक कटनीमे सुस्ती अछि।
वास्तवमे बिहारमे पैक्सक चुनाव चलि रहल अछि, जाहिमे अधिकांश अध्यक्ष आ किसानक ध्यान चुनाव पर अछि। अंतिम चरणक मतदान ३ दिसम्बरकेँ अछि। एकर बाद धानक खरेदीमे तेजी आबय केर उम्मीद अछि।
कहल जा रहल अछि जे जतय क्रय केंद्र खुजल अछि, ओतय किसान नहिं पहुँचि रहल छथि। जानकारीक अनुसार रवि दिन धरि अररियामे २२३४ मीट्रिक टन आ कोसी क्षेत्रक सहरसामे ६८६ मीट्रिक टन धान खरीदल जा चुकल अछि। सीवान, सीतामढ़ी, पूर्णिया सहित कतेको जिलामे धानक खरेदी सेहो शुरू भऽ गेल अछि।
राज्यक दक्षिणी भागमे धानक कटाई एखन धरि पूरा नहि भेल अछि, जतय भेल अछि ओतय एखनि धानमे नमी अछि, जाहि कारणेँ किसान क्रय केन्द्र धरि नहि पहुँचि रहल छथि। सरकारी नियमक अनुसार धानमे बेसी नमी रहला पर धानक खरेदी नहि होयत। कहल जा रहल अछि जे किसान रौदमे धान सुखा रहल छथि, जाहिसँ ओहिमे नमी कम कयल जा सकय। अनुमान अछि जे ५ दिसंबरक बाद धानक खरीदमे तेजी आबि जायत।
