तेलंगानाक आदिलाबादमे एकटा जनसभाकेँ सम्बोधित करैत प्रधानमंत्री नरेन्द्र मोदी कहलनि, “किछु लोक आदतिसँ विवश होइत छथि आ तेँ बहुत सरल भाषामे कहि दैत छथि जे ई एकटा चुनावी सभा अछि, जखन कि ई चुनावी सभा नहिं अछि, चुनावक घोषणा एखन धरि नहिं कयल गेल अछि। आइ देशमे जे विकासक उत्सव चलि रहल अछि, ओहिमे हम एतय तेलंगानाक भाइ-बहिनक बीच ई विकास महोत्सव मनयबाक लेल आयल छी।”
मोदी आगू कहलनि “तेलंगानाक लोककेँ पता चलि चुकल अछि जे परिवारवादी दलक चेहरा अलग-अलग भऽ सकैत अछि मुदा चरित्र एक समाने होइत अछि आ हुनक चरित्रमे दूटा मजबूत चीज अछि – एकटा झूठ आ दोसर लूट। तेलंगानामे, जेना टीआरएसक बीआरएस बनलासँ किछु नहि बदलल, तहिना बीआरएसक स्थान पर कांग्रेस केर अयलासँ किछु नहिं बदलत। ई लोक सभ एक्कहि प्रकृतिक छथि।”
प्रधानमंत्री नरेन्द्र मोदी आगू कहलनि, “भाजपा आदिवासी कल्याण आ गौरवकेँ सर्वोच्च प्राथमिकता दैत काज कऽ रहल अछि। आदिवासीयो समाजमे जे अत्यंत पिछड़ल छथि, जे एखन धरि विकाससँ वंचित छथि, हुनका लेल भाजपा सरकार ‘पीएम-जनमन’ योजना शुरू कयलक। एहि योजना पर २४ हजार करोड़ टाकासँ बेसी खर्च होएत।
प्रधानमंत्री नरेन्द्र मोदी कहलनि, “भाजपा देशक विकासक लेल प्रतिबद्ध अछि। इहे कारण अछि जे तेलंगानाक लोक सेहो पूरा उत्साहक संग कहि रहल छथि जे एहि बेर ४०० पार।”
नरेन्द्र मोदी कहलनि “हमर जीवन एकटा खुजल किताब जकाँ अछि। देशवासी हमरा नीक जकाँ जनैत छथि आ हमरा बुझैत छथि। देश हर क्षण हमर समाचार रखैत अछि। कखनो काल जखन हम देर राति धरि काज करैत छी आ समाचार निकलैत अछि तखन देश भरिक लाखो लोक हमरा लिखैत छथि जे एतेक काज नहिं करू, किछु आराम करू।”
मोदी कहलनि, “भ्रष्टाचार, परिवारवाद आ तुष्टीकरणमे आकंठ डूबल आईएनडी गठबंधनक नेता हताश भऽ रहल छथि। आब ओ सभ २०२४क चुनावक लेल अपन वास्तविक घोषणापत्र लऽ कऽ आबि गेल छथि। जखन हम हुनकर भाई-भतीजावाद पर सवाल उठबैत छी तखन ई लोक आब ई कहय लागल छथि जे मोदीक कोनो परिवार नहिं अछि। काल्हि ओ इहो कहि सकैत छथि जे अहाँकेँ कहियो जेलक सजा नहिं भेटल अछि तेँ अहाँ राजनीतिमे सेहो शामिल नहि भऽ सकैत छी।”
