बिहारक मुख्यमंत्री नीतीश कुमार सोमदिन कहलनि जे पूर्व प्रधानमंत्री अटल बिहारी वाजपेयी हुनका बिहारक मुख्यमंत्री बनयबामे पैघ योगदान देलनि। पूर्व प्रधानमंत्री अटल बिहारी वाजपेयीक जयंती समारोहमे भाग लेलाक बाद संवाददाता सभसँ बातचीत करैत मुख्यमंत्री कहलनि जे अटल जीक सरकारमे हम तीन विभागक मंत्री छलहुँ। ओ हमरा पर बहुत विश्वास कयलनि।
ओ कहलनि जे हमरा बिहारक मुख्यमंत्री बनयबामे अटल जीक योगदान अपार अछि। हुनका प्रति हमर सम्मान सदैव रहल अछि आ ई जीवन भरि बनल रहत। जाबत धरि अटल जी प्रधानमंत्री छलाह, कोनो धर्मक लोककेँ कोनो तरहक समस्याक सामना नहि करय पड़लनि।
अटल बिहारी वाजपेयीक विचारधारासँ जुड़ल एकटा सवालक जवाबमे मुख्यमंत्री कहलनि कि हम जे किछु कहलियैन ओ स्वीकार करैत छलाह। हुनक समयमे बहुत काज भेल छल। ओ हर क्षेत्रमे मदद केलखिन, हम सब सेहो काज केलहुं।
दोसर तरफ नीतीश इंडिया गठबंधनसँ कोनो प्रकारक असंतोषसँ इनकार कयलनि। ओ कहलखिन जे ओ कोनो पद नहिं चाहैत छथि, हम चाहैत छी जे सब किछु जल्दी हो। इंडिया गठबंधनसँ अप्रसन्नताक विषयमे पूछला पर ओ कहलनि जे जखनि हमरासभकेँ किछु नहिं चाही तखन नाराज होयबाक अर्थ कतए अछि। हम कतहु नाराज नहिं छी, ई जे कहल जा रहल अछि ओ गलत अछि।
ओ आगू कहलनि कि सीट बंटवारा सेहो समय पर कैल जायत। हम एखनि कहलहुं जे राज्यक सीट केर जल्दी बांटि दियौक, सब किछु जल्दी तय करू।
जदयूमे भाजपा नेता सुशील मोदीक फूट आ अध्यक्ष ललन सिंह द्वारा हुनका हटा देल जेबाक बयानक बारेमे पूछला पर नीतीश कहलनि, “हम एहि बात पर ध्यान नहिं दैत छी जे के की बजैत अछि। आइ-काल्हि किछु लोक जे किछु मनमे अबैत अछि से कहैत रहैत छथि, जाहिसँ हुनका एकर लाभ होय, मुदा एहि सभसँ केकरो लाभ नहिं भेटयवाला अछि।
ओ कहलनि “हमर पार्टीमे एम्हर-ओतए कियो नहिं अछि। हमर पार्टीमे सब एकजुट अछि, कतहु कोनो समस्या नहिं अछि।” मुख्यमंत्री आगू संवाददाता सभसँ कहलनि जे देखू बिहारमे कतेक काज भऽ रहल अछि। १० लाख लोककेँ नौकरी भेटय केर बात कहल गेल छल, आधाक लगपास हमसभ पहुंचि गेल छी।
