विकासशील इंसान पार्टी (वीआईपी) केर प्रमुख मुकेश सहनीक पिता जीतन सहनीक निर्मम हत्या बिहारक राजनीतिकेँ गर्म कऽ देलक अछि। एहि मामिलामे राजनीतिक दलक नेता सभक लगातार प्रतिक्रिया भेटि रहल अछि।
समाज कल्याण मंत्री मदन सहनी कहलनि, “हमरा किछु समय पहिने हत्याक सूचना भेटल अछि। हम घटनास्थल पर जा रहल छी। मुकेश सहनी एखन मुम्बईमे छथि आ एहि मामिलामे डीजीपीसँ गप्प कयने छथि। लगमे लागल सीसीटीवी फुटेजकेँ सेहो स्कैन कयल जा रहल अछि। बहुत जल्दिये हत्याराक पता चलत जे ई घटना के केलक। पुलिस जांचमे सब तथ्य सामने आबि जाएत।”
अनुसूचित जाति आ अनुसूचित जनजाति कल्याण मंत्री जनक चमार कहलनि, “हमरा मीडियाक माध्यमसँ सूचना भेटल जे मुकेश सहनीक पिताक धारदार हथियारसँ हत्या कयल गेल छल। एहि घटनामे शामिल अपराधीकेँ बख्शल नहिं जायत। सरकार एकटा एसआईटी केर गठन कयलक अछि। जे दोषी होएत ओकरा पर कार्रवाई कएल जाएत।”
सूचना आ जनसम्पर्क मंत्री महेश्वर हजारी कहलनि, “मुकेश सहनीक पिताक हत्याक घटना दुर्भाग्यपूर्ण अछि। घटनाक सूचना भेटैत शीर्ष अधिकारी घटनास्थल पर पहुँचलाह आ टीम जाँच कऽ रहल अछि। एहि अपराधमे शामिल अपराधीकेँ बख्शल नहि जायत।”
पूर्णियाक सांसद राजेश रंजन उर्फ पप्पू यादव एहि घटना पर दुख व्यक्त करैत कहलनि, “बिहारमे अपराधक घटना लगातार सामने आबि रहल अछि। मुकेश सहनीक पिताक हत्याक घटना दुखद अछि। बिहारमे सरकार आ प्रशासन मात्र लूटपाटमे लागल अछि। बिहार सरकारक कानून-व्यवस्थासँ कोनो लेना-देना नहिं अछि। एतय अपराधीसभकेँ सत्ताक संरक्षणमे आश्रय देल जा रहल अछि। अपराधी सभसँ जुड़ल अधिकारीक विरुद्ध कारवाई कयल जेबाक चाही।”
पूर्व केन्द्रीय मंत्री आ भाजपा नेता शाहनवाज हुसैन कहलनि, “बिहार सरकार मुकेश सहनीक परिवारक संग ठाढ़ अछि। एहि घटनामे शामिल अपराधीकेँ बख्शल नहिं जायत। एहि घटना पर राजद यवा अन्य विपक्षी दल जे बयानबाजी कऽ रहल अछि ओकरा एहन बयान नहि देबाक चाही।”
मुकेश सहनीक पिताक निधन पर राजद नेता मृत्युंजय तिवारी कहलनि, “बिहारसँ आइ भोरे एकटा दुखद खबरि सामने आयल अछि। मुकेश सहनीक पिताक हत्याक घटना बिहारकेँ हिला देलक अछि। जखनि नेताक परिवारक सदस्य सुरक्षित नहिं छथि तखनि आम लोकक की होयत। बिहारक डबल इंजन सरकारमे अपराधक शासन स्थापित भेल अछि। दुखक एहि घड़ीमे हम मुकेश सहनीक परिवारक संग छी।”
सपा प्रवक्ता अनुराग भदौरिया कहलनि, “जाहि तरहें धारदार हथियारसँ हत्या भेल, ई घटना दुखद अछि। एतय तक कि विपक्षक नेताक पिता सेहो बिहारमे सुरक्षित नहिं छथि। बिहारमे भाजपा सरकारक अधीन मात्र गुण्डा राज चलि रहल अछि।”
