पूर्व राष्ट्रपति रामनाथ कोविंदक अध्यक्षतावाला हाई पावर्ड कमेटी बृहस्पतिकेँ ‘एक राष्ट्र, एक चुनाव’ पर अपन रिपोर्ट सौंपलक। ई रिपोर्ट बृहस्पति दिन भोरमे राष्ट्रपति द्रौपदी मुर्मूकेँ सौंपल गेल। रिपोर्टमे पैनल देश भरिमे एक सङ्ग चुनाव करयबाक समर्थन कयलक अछि।
रिपोर्टमे कहल गेल अछि जे समितिक सर्वसम्मत विचार अछि जे एक सङ्ग चुनाव होयबाक चाही। ‘एक राष्ट्र, एक चुनाव’ लोकसभा आ सभ राज्य विधानसभाक चुनाव एक सङ्ग करबाक प्रस्ताव रखैत अछि। वर्तमानमे भारतमे संसद आ राज्य विधानसभाक चुनाव अलग-अलग होइत अछि।
एहि रिपोर्टमे १८,६२६ पृष्ठ अछि, आ ई हितधारक, विशेषज्ञसभक सङ्ग व्यापक परामर्श आ २ सितंबर, २०२३केँ एकर गठनक बादसँ १९१ दिनक शोध कार्यक परिणाम अछि।
पाँचटा अनुच्छेदमे – संसदक सदनक अवधिसँ सम्बन्धित अनुच्छेद ८३, लोक सभाक विघटनसँ सम्बन्धित अनुच्छेद ८५, राज्य विधानमंडलक अवधिसँ सम्बन्धित अनुच्छेद १७२, राज्य विधानमंडलक विघटनसँ सम्बन्धित अनुच्छेद १७४ आ राज्यमे राष्ट्रपति शासन लगयबाक अनुच्छेद ३५६ अछि। समितिक ई रिपोर्ट १९१ दिनक शोध काजक परिणाम अछि।
एहि समितिक गठन पछिला साल २ सितम्बरकेँ कयल गेल छल आ एकर अध्यक्षता पूर्व राष्ट्रपति रामनाथ कोविंद कऽ रहल छथि। समिति राजनीतिक दल, संवैधानिक विशेषज्ञ, पूर्व मुख्य निर्वाचन आयुक्त आ निर्वाचन आयोग एवं अन्य संबंधित हितधारकसभक सङ्ग परामर्श कऽ रहल छल जाहिसँ हुनकर विचार प्राप्त कयल जा सकय आ एहि मामिलामे गहन जानकारी जुटायल जा सकय। समितिक कार्यक्षेत्रमे अन्य पहलूक अतिरिक्त, शासन, प्रशासन, राजनीतिक स्थिरता, व्यय आ मतदाताक भागीदारी पर चुनावक सम्भावित प्रभावक जाँच करब शामिल अछि।
