देशमे एमपाॅक्सक एकटा संदिग्ध रोगी भेटलाक बाद केन्द्र सरकार सतर्क भऽ गेल अछि। सोमदिन स्वास्थ्य मंत्रालय सभ राज्य आ केंद्र शासित प्रदेशकेँ पत्र लिखि परामर्श जारी कयलक अछि। राज्यसभकेँ सलाह देल गेल अछि जे ओ सावधानी बरतथि आ संदिग्ध एमपाॅक्सक रोगीसभक जाँच करथि आ हुनकासँ हुनक सम्पर्कक पता लगाउ।
स्वास्थ्य मंत्रालय द्वारा लिखल गेल पत्रमे कहल गेल अछि जे विश्व स्वास्थ्य संगठन एमपाॅक्सकेँ चिन्ताक विषय घोषित कयलक अछि। अतः एकरासँ निपटबाक लेल सख्त निगरानी आ सभ उपाय कयल जयबाक चाही। एहि संबंधमे सभ जानकारी स्वास्थ्य मंत्रालयकेँ देल जयबाक चाही। मंत्रालय कहलक अछि जे एमपाॅक्सक संदिग्ध मरीजक नमूनाक जाँच लेल कतेको प्रयोगशालाक स्थापना कयल गेल अछि, जकर जानकारी सभ राज्यकेँ देल गेल अछि। एकरा संग सभ राज्यक लेल प्रोटोकॉल सेहो जारी कऽ देल गेल अछि।
केन्द्रीय स्वास्थ्य सचिव अपूर्व चन्द्रा राज्यसभकेँ पत्र लिखि लोकसभमे अनावश्यक दहशत पसरयबासँ बचबाक लेल कहलनि। ओ कहलनि “वर्तमान प्रकोपमे भारतमे एमपाॅक्सक कोनो नव मामिला सामने नहिं आयल अछि आ संदिग्ध मामिलाक कोनो नमूनामे संक्रमणक पुष्टि नहिं भेल अछि। ओ सतर्क रहबाक आवश्यकता पर जोर देलनि। ओ कहलनि कि मंत्रालय लगातार स्थिति पर नजरि राखि रहल अछि।
उल्लेखनीय अछि जे रविदिन भारतमे एमपाॅक्सक एकटा संदिग्ध रोगी भेटल छल। केन्द्रीय स्वास्थ्य मंत्रालय सूचित कयलक जे एकटा एहेन व्यक्तिमे एमपाॅक्सक लक्षण भेटल अछि जे हालहिमे विदेशसँ भारत आयल अछि। संदिग्ध मरीजक इलाज अस्पतालमे अलग-थलग कयल जा रहल अछि। अधिकारीसभक अनुसार, संदिग्ध रोगीक स्थिति ठीक अछि, जखन कि ओकर नमूना जाँचक लेल पठाओल गेल अछि। मंत्रालयक अनुसार, ओहि व्यक्तिक संपर्कमे आबयवला सभटा लोकक प्रोटोकॉलक अनुसार जाँच कयल जा रहल अछि।
