तेजस्वीक संग पूर्व मंत्री श्याम रजक, विधान परिषद सदस्य सुनील कुमार सिंह, शक्ति यादव आ अन्य छलाह।
एमएलसी सिंह कहलखिन कि लालू प्रसादक परिवारकेँ परेशान कएल जा रहल अछि। जहिना सरकार खसि पड़ल, ईडीक अधिकारी पहुँचि गेलाह।
ओ बतौलनि जे लालू प्रसादक किडनी प्रत्यारोपण भेल अछि आ १० घंटा बैसाकय हुनकासँ पूछताछ कयल गेल।
सोमदिन तेजस्वीक पिता आ राजद अध्यक्ष लालू प्रसादसँ सेहो ईडीक अधिकारी पूछताछ केलथि। सूत्रक अनुसार अधिकारी सभ १० घंटाक पूछताछ मे लालू यादवसँ लगभग ५० टा सवाल पूछलनि।
सीबीआई आरोप लगओलक अछि जे जांचक दौरान पता चलल जे आरोपी मध्य रेलवेक तत्कालीन जीएम आ सीपीओक संग षड्यंत्र केलक आ लालूक निकट रिश्तेदारक नाम पर जमीनक बदलामे लोककेँ नियुक्त कयलक।
सीबीआई लालू यादव, हुनकर पत्नी राबड़ी देवी, दूटा बेटी आ अज्ञात लोक सेवक आ निजी व्यक्ति सहित १५ गोटेकेँ खिलाफ मामला दर्ज कयने छल।
अधिकारी कहलखिन, “2004-2009 केर अवधिमे लालू यादव रेलवेक विभिन्न जोनमे ग्रुप डी पदक विकल्पक रूपमे नियुक्तिक बदला अपन परिवारक सदस्यक नाम पर जमीन आ संपत्तिक हस्तांतरणक रूपमे आर्थिक लाभ प्राप्त कयलनि।
पटनाक बहुत रास निवासी लालू प्रसादक परिवारक सदस्य आ हुनक आ हुनक परिवार द्वारा नियन्त्रित एकटा निजी कम्पनीक पक्षमे अपन जमीन बेचि देलनि आ उपहारमे दऽ देलनि।
जोनल रेलवेमे स्थानापन्नक एहन नियुक्तिक लेल कोनो विज्ञापन या कोनो सार्वजनिक नोटिस जारी नहिं कयल गेल छल, तैयो नियुक्त व्यक्ति जे पटनाक निवासी छलैथ, तिनका सभकेँ मुंबई, जबलपुर, कोलकाता, जयपुर आ हाजीपुरमे स्थित विभिन्न क्षेत्रीय रेलवेमे पदेन नियुक्त कयल गेल छल।
“एहि कार्यप्रणालीकेँ जारी रखैत यादव आ हुनक परिवारक सदस्य द्वारा पाँचटा बिक्री विलेख आ दूटा उपहार विलेखक माध्यमसँ पटनामे स्थित लगभग १,०५,२९२ वर्ग फीट जमीनक अचल सम्पत्ति अधिग्रहित कयल गेल, जाहिमेसँ अधिकांश विक्रेताकेँ कयल गेल भुगतानकेँ दर्शाबैत छल।
मार्चमे ईडी रिकॉर्डमे कहलक जे विशिष्ट खुफिया जानकारीक आधार पर दिल्ली, मुंबई, पटना आ रांची मे 24 जगह पर छापाक दौरान 1 करोड़ रुपया, 1900 डॉलर, 540 ग्राम सोना आ 1.5 किलो सोनाक आभूषण आ अन्य आपत्तिजनक दस्तावेज बरामद कैल गेल छल।
ईडी कहलक जे हुनका लगभग 600 करोड़ टाकाक पता चलल जे 350 करोड़ टाकाक अचल संपत्ति आ 250 करोड़ टाकाक लेनदेनक रूपमे अपराध (पीओसी) सँ प्राप्त आय छल जे विभिन्न ‘बेनामीदार’क माध्यमसँ कयल गेल छल।
प्रवर्तन निदेशालय कहलक जे एखन धरि कयल गेल पीएमएलए जाञ्चसँ पता चलल अछि जे लालू प्रसादक परिवार रेलवेमे नौकरीक बदलामे पटना आ अन्य क्षेत्रक प्रमुख स्थानपर कतेको जमीन अवैध रूपसँ अधिग्रहित कयने छल। एहि भूखंडक वर्तमान बाजार मूल्य २०० करोड़ टाकासँ बेसी अछि।
अधिकारी कहलनि जे एहि जमीनक लेल कतेको ‘बेनामीदार’, मुखौटा संस्था आ लाभकारी मालिकक पहिचान कयल गेल अछि।
ईडी दावा केलक, “एकटा संपत्ति (डी-1088, न्यू फ्रेंड्स कॉलोनी, दिल्ली मे स्थित 4 मंजिला बंगला, जे एबी एक्सपोर्ट्स प्राइवेट लिमिटेड के नाम पर पंजीकृत अछि, जेकर स्वामित्व आ नियंत्रण तेजस्वी प्रसाद यादव आ परिवारकेँ अछि) मात्र 4 लाख रुपया मूल्य पर अधिग्रहित कैल गेल छल, जकर वर्तमान बाजार मूल्य लगभग 150 करोड़ रुपया अछि।
अधिकारी कहलनि जे एहि सम्पत्तिकेँ किनबामे पैघ मात्रामे नकद/अपराधसँ प्राप्त आयक उपयोग कयल गेल छल आ मुम्बईमे स्थित रत्न आ आभूषण क्षेत्रमे कार्यरत किछु संस्थाक उपयोग एहि सम्बन्धमे अपराधक अवैध आयकेँ चैनल करबाक लेल कयल गेल छल।यद्यपि, सम्पत्तिकेँ कागज पर ए.बी. एक्सपोर्ट्स प्राइवेट लिमिटेड आ एके इन्फोसिस्टम प्राइवेट लिमिटेडक कार्यालयक रूपमे घोषित कयल गेल अछि, जखनि कि एकर उपयोग विशेष रूपसँ तेजस्वी प्रसाद द्वारा आवासीय परिसरक रूपमे कयल जा रहल अछि। तलाशीक दौरान तेजस्वी प्रसाद एहि जगह पर भेटलैथ। ईडीक आरोप अछि जे ओ घरक उपयोग अपन आवासीय सम्पत्तिक रूपमे कयलनि।
प्रवर्तन निदेशालय कहलक जे ओकर जांचमे पता चलल अछि जे लालू यादवक परिवार द्वारा गरीब ग्रुप-डी आवेदकसँ मात्र साढ़े सात लाख टाकामे जमीन अधिग्रहित कयल गेल छल, जकरा राबड़ी देवी राजदक पूर्व विधायक सैयद अबू दोजानाकेँ ३.५ करोड़ टाकाक भारी लाभक सङ्ग सांठगांठ सौदामे बेचि देलनि।
ईडी कहलक जे ओकर जांचमे इहो पता चलल अछि जे एहि तरहें प्राप्त राशिक एकटा पैघ हिस्सा तेजस्वी प्रसादक खातामे स्थानांतरित कयल गेल छल।
ईडी कहलक, “जांचमे पता चलल अछि जे तहिना रेलवेमे ग्रुप डीक नौकरीक बदलामे कतेको गरीब माता-पिता आ उम्मीदवारसँ जमीन लेल गेल छल। जांचक दौरान पता चलल अछि जे कतेको रेलवे जोनमे भर्ती भेल ५० प्रतिशतसँ अधिक लालू यादव परिवारक विधानसभा क्षेत्रसँ छल। आगुक जाँच जारी अछि।
