कोविशील्ड टीकाक दुष्प्रभावकेँ लऽ कऽ किछु दिनसँ राजनीति चलि रहल अछि। जतय विपक्ष सवाल उठा रहल अछि, सत्तारूढ़ दल मुस्तैदीसँ प्रश्नक उत्तर देबामे जुटल अछि। एम्हर विशेषज्ञ चिकित्सक लोकसभसँ अपील कयलनि अछि जे ओ घबराउथ नहिं।
यूकेक फार्मा कंपनी एस्ट्राजेनेका पहिल बेर लन्दनक एकटा अदालतमे स्वीकार कयलक अछि जे कोरोना वायरसक विरुद्ध ओकर टीका दुर्लभ मामिलामे गम्भीर दुष्प्रभाव उत्पन्न कऽ सकैत अछि। एकर बाद एहि पर राजनीति तेज भऽ गेल अछि। राजनीतिक दल एक दोसरा पर आरोप लगा रहल अछि।
सङ्गहि स्वास्थ्य विशेषज्ञसभक मानब छनि जे एहि टीकाक लाभ बेसी अछि आ नोकसान बहुत कम अछि। एहि लेल कोविशील्ड टीकाक बारेमे घबराबय केर जरूरत नहिं अछि। टीका सुरक्षित अछि आ जिनका दुष्प्रभाव हेबाक छल ओ टीकाकरणक बादहि भेल होयत।
विशेषज्ञलोकनिक कहब छनि जे कोविशील्डक विषयमे आबि रहल खबरसँ घबरयबाक कोनो आवश्यकता नहिं अछि।
कार्डियोलॉजिस्ट डॉ. एसडी जोशी कहलनि जे “कोविड टीका लगयलाक एकसँ छह सप्ताहक बाद साइड इफेक्ट्स आबि जाइत अछि। लोककेँ डरए केर कोनो बात नहिं अछि।” देशमे एखन धरि २३० करोड़ टीकाक खुराक देल जा चुकल अछि। जँ दुष्प्रभाव होइत तँ एखन धरि आधासँ बेसी लोकक मृत्यु भऽ गेल होयत। मुदा ओ नहि भेल, तेँ घबराउ नहिं।
संगहि न्यूरोसर्जन डॉ. महेश कुड़ियाल सेहो कहलनि जे टीकाक विषयमे घबरायबाक कोनो आवश्यकता नहिं अछि।
कांग्रेसक प्रदेश उपाध्यक्ष सूर्यकांत धस्माना कहलनि जे यूके अदालतमे एकटा शपथपत्रमे सीरम कंपनी स्वीकार कयलक अछि जे हुनकर टीकाक कारण हृदयाघात, मस्तिष्क रक्तस्राव आ रक्त जमबाक सम्भावना छैक। देशक करोड़ो लोककेँ कोविशील्ड टीका लगाओल जा चुकल अछि। इ सबके डरा देलक।
प्रदेश भाजपा मीडिया मनवीर चौहान कहलनि जे जाहि तरहें कांग्रेस आ अन्य विपक्षी दल करोड़ो लोकक जीवनक रक्षा करयवला टीकाक विरुद्ध झूठ प्रचार कऽ रहल अछि, ई कोनो एजेण्डाक हिस्सा अछि।
ई टीका देशमे करोड़ो लोकक जान बचा लेलक। ओहि समय सेहो विपक्षी दल सवाल उठौने छल। एकरा मोदी टीकाक रूपमे गलत ब्रांडेड कयल गेल छल। बादमे, ओ स्वयं टीकाकरण करेलनि। पूरा दुनिया भारतमे बनल वैक्सीनक लाभ उठेलक। मुदा आइ देशमे चुनावी माहौलक दौरान दुष्प्रचार कय जनताकेँ भ्रमित कयल जा रहल अछि।
