स्वयं सांसद निलंबनक अनुरोध करैत छथि आ बाहर लगबैत छथि आरोप – ओम बिरला
लोकसभा अध्यक्ष निलंबित सांसदक एहि तरीकाकेँ गलत बतौलनि
*
नई दिल्ली
*
बृहस्पति दिन विपक्षी सांसद लोकसभामे सांसदक निलंबनक मुद्दा पर हंगामा जारी रखलनि। शोर-शराबाक बीच लोकसभा अध्यक्ष ओम बिड़ला पूरा समय प्रश्नकाल चलौलनि।
मुदा प्रश्नकाल समाप्त भेलाक बाद जखन विपक्षी दलक सांसदक हंगामा बढ़ल तखन ओम बिड़ला आन्दोलनकारी सांसदसभकेँ कड़ा फटकार लगबैत कहलनि जे सांसद हुनका लग आबि अनुरोध करैत छथि जे हुनका सभकेँ निलम्बित कऽ देल जाय आ बाहर जा कऽ आरोप लगबैत छथि जे हुनका सभकेँ निलंबित कऽ देल गेल, ई तरीका सही नहिं अछि।
लोकसभा अध्यक्ष ओम बिड़ला कांग्रेसक तीन टा सांसद डीके सुरेश, नकुल नाथ आ दीपक बैजक नाम लैत कहलखिन कि तीनू सांसद बेर-बेर सदनक कार्यवाहीमे बाधा डालि रहल छथि, प्ले कार्ड आनि रहल छथि, नारा लगा रहल छथि आ कागज फाड़ि-फाड़ि कर्मचारी पर फेंकि रहल छथि, ई सदनक मर्यादाक अनुरूप नहिं अछि। ई सही तरीका नहिं अछि।
ओ विपक्षी सांसदक आलोचना करैत कहलनि जे ओ बिना कोनो कारणक कोनो सांसदकेँ निलम्बित नहिं कयलनि अछि, ओ कोनो सांसदकेँ निलम्बित नहिं करय चाहैत छथि। सांसद हुनका लग अबैत छथि आ कहैत छथि जे हुनका निलंबित करू, की ई तरीका सही अछि ?
ओ कहलनि जे सांसद हुनका निलम्बित करबाक अनुरोध लऽ कऽ अबैत छथि आ बाहर जा कय आरोप लगबैत छथि जे हुनका निलम्बित कऽ देल गेल अछि।
अध्यक्ष आन्दोलनकारी सांसदसभसँ पुछलनि जे की जनता हुनका तख्ती लहराबय आ कागज फाड़य लेल चुनलक अछि। ओ आबैथ, सदनक कार्यवाहीमे भाग लैथ, हुनका बजबाक मौका देल जयतनि, मुदा ओ आबि ई कहैथ जे बस निलंबित कऽ दिअ, ई सही तरीका नहिं अछि।
