मानसून पुनः बिहारमे भेल सक्रिय, 25 जिलामे भारी वर्षाक चेतावनी
पटना । समदिया
बिहारमे किछु दिनसँ सुस्त पड़ल मानसून फेर सक्रिय भऽ गेल अछि। भारतीय मौसम विभाग (आईएमडी) राज्यक 25 जिलाक लेल भारी वर्षाक चेतावनी जारी कएलक अछि। उत्तर बिहारक अधिकांश जिलामे जोरदार वर्षाक संभावना व्यक्त कएल गेल अछि, जखनकि राजधानी पटना सहित दक्षिण आ मध्य बिहारमे भारी वर्षाक संभावना कम अछि।
एहि जिलासभमे भारी वर्षाक चेतावनी :
पश्चिम चंपारण, पूर्वी चंपारण, गोपालगंज, सिवान, सारण, मुजफ्फरपुर, वैशाली, शिवहर, सीतामढ़ी, मधुबनी, दरभंगा, समस्तीपुर, सुपौल, सहरसा, मधेपुरा, अररिया, किशनगंज, पूर्णिया, कटिहार आ खगड़ियामे भारी वर्षा होएबाक संभावना अछि।
पाँच जिलामे मेघगर्जन आ आँधीक आशंका
कैमूर, मुंगेर, भागलपुर, बांका आ जमुई जिलामे वर्षाक संग मेघगर्जन आ तेज आँधी चलबाक संभावना व्यक्त कएल गेल अछि। मौसम विभाग लोकसभसँ आग्रह कएने अछि जे आँधी-तूफानक समय खुला स्थानसँ दूर रहथि तथा बिजली कड़कबाक सूचना भेटलापर सुरक्षित भवनमे शरण लेने रहथि।
पटना, गया सहित चारि जिलामे उमससँ राहत नहि
पटना, गया, नालंदा आ नवादा जिलामे तेज घाम आ बेसी आर्द्रताक कारण उमस बनल रहत। साँझक समय कतेको स्थान पर हलुक बूंदाबांदीसँ किछु राहत भेटि सकैत अछि। पछिला 24 घंटामे बक्सरमे राज्यक सर्वाधिक 36.5 डिग्री सेल्सियस तापमान दर्ज कएल गेल। भोजपुरमे 36.3, पटनामे 35.9 आ औरंगाबादमे 35.8 डिग्री सेल्सियस अधिकतम तापमान दर्ज भेल।
फेर कोना सक्रिय भेल मानसून
मौसम वैज्ञानिकसभक अनुसार, बंगालक खाड़ीसँ आबि रहल नम हवा उत्तर-पूर्व बिहार धरि मजबूत रूपेँ पहुँचि रहल अछि। एहिसँ ओहि क्षेत्रमे बेसी बादल बनि रहल अछि आ वर्षाक मात्रा सेहो बेसी अछि। मुदा दक्षिण आ मध्य बिहार धरि पहुँचैत-पहुँचैत मानसूनी प्रवाह कमजोर पड़ि जाइत अछि, जाहिसँ ओतय वर्षा कम भऽ रहल अछि।
दक्षिण बिहारक किसानसभक चिंता बढ़ल
मानसूनक कमजोर गतिविधिक कारण दक्षिण बिहारक किसानसभक चिंता बढ़ि गेल अछि। एहि मौसममे राज्यमे एखनि धरि सामान्यसँ लगभग 42 प्रतिशत कम वर्षा दर्ज कएल गेल अछि। सामान्य रूपसँ एखन धरि लगभग 494.8 मिमी वर्षा होयबाक चाही छल, मुदा मात्र 288 मिमी वर्षा दर्ज कएल गेल अछि। एहि कारण खेती-बारी पर प्रतिकूल प्रभाव पड़बाक आशंका बढ़ि गेल अछि।
