मास्टरमाइंड ललित झा संसद सुरक्षा उल्लंघन मामिलामे कयलक आत्मसमर्पण

नई दिल्ली

*

दिल्ली पुलिस मास्टरमाइंड ललित झाकेँ गिरफ्तार कयलाक बाद १३ दिसंबरक संसद सुरक्षा उल्लंघनक मामलाक जाञ्चक सिलसिलामे दूटा आओर लोककेँ हिरासतमे लयलक अछि।

वृहस्पति कऽ दिल्ली पुलिस ललित झाकेँ बंदी बनेलाक बाद महेश आ कैलाश नामक दूटा आओर लोककेँ हिरासतमे लेलक अछि।

सूत्रक मानी तऽ स्पेशल सेल संसदक बाहर एकटा क्राइम सीन रिक्रियेट करत अपराधक स्वरूप जानय लेल, जे ओ सभ धुआँक डिब्बाक संग लोकसभाक भीतर कोना पहुँचबामे सफल रहल।

बृहस्पतिक राति गिरफ्तार कयल गेल झाकेँ अदालतमे पेश कयल जायत। ललित झा बृहस्पति राति नई दिल्ली जिलाक कर्तव्य पथ पुलिस थानामे आत्मसमर्पण कयलक आ ओकरा घटनाक आगूक जाञ्चक लेल विशेष शाखाकेँ सौंपि देल गेल।

दिल्लीक एकटा अदालत बृहस्पतिकेँ संसदक सुरक्षा उल्लंघनक मामिलामे गिरफ्तार चारि अभियुक्तकेँ सात दिनक पुलिस हिरासतमे पठा देलक।

पश्चिम बंगालक निवासी आ बिहारक मूल निवासी ललित झा आ सहयोगीक खिलाफ संसद मार्ग पुलिस स्टेशनमे दर्ज मामलामे आईपीसी के धारा 120-बी, 452, 153, 186 आ 353 के संग-संग यूएपीए के धारा 16 आ 18 शामिल अछि।

अदालतक कार्यवाहीक दौरान अभियोजन पक्ष गिरफ्तार व्यक्तिकेँ आतंकवादी करार देलक आ दावा केलक कि ओ सब भय पैदा करय के इरादासँ संसद पर योजनाबद्ध हमला कयलक ।

पुलिस अदालतकेँ सूचित कयलक जे ओ अभियुक्तक विरुद्ध आरोपमे यूएपीए अधिनियमक धारा १६ (आतंकवाद) आ १८ (आतंकवाद करबाक षड्यंत्र) शामिल कयलक अछि।