महाराष्ट्र विधानसभा शिक्षा आ नौकरीमे आरक्षणक लेल मराठा आरक्षण विधेयक पारित कयलक अछि। मराठा आरक्षण विधेयक महाराष्ट्र विधानसभामे मुख्यमंत्री एकनाथ शिंदे द्वारा प्रस्तुत कयल गेल छल। महाराष्ट्र सरकार मराठा कोटा पर एकटा आयोगक रिपोर्ट स्वीकार कऽ लेलक अछि आ शिक्षा आ सरकारी नौकरीमे समुदायक लेल १० प्रतिशत कोटाक सिफारिश करयवला विधेयकक मसौदाकेँ मंजूरी देलक अछि। अधिकारी सब मंगल दिन एतय इ जानकारी देलनि।
महाराष्ट्र राज्य पिछड़ा वर्ग आयोग (एमएसबीसीसी)क रिपोर्ट आ विधेयकक मसौदा महाराष्ट्र विधानमण्डलक एक दिवसीय विशेष सत्रमे प्रस्तुत कयल जायत। सत्रक मुख्य एजेंडा मराठा कोटा अछि।
सेवानिवृत्त न्यायाधीश सुनील शुक्रेक अध्यक्षतामे एमएसबीसीसी शुक्रदिन १६ फरवरीकेँ मुख्यमंत्री एकनाथ शिंदेकेँ अपन विस्तृत रिपोर्ट सौंपलक, जाहिमे मराठा समुदायक पिछड़ापनक जाँच कयल गेल।
शिंदे सरकार महाराष्ट्र विधानसभाक एकटा विशेष सत्र आयोजित कऽ रहल अछि जे मराठा समुदायक लेल आरक्षणक बहुत दिनसँ लंबित मुद्दाक लेल क्रांतिकारी भऽ सकैत अछि। यद्यपि ओबीसी नेता छगन भुजबल संशयमे छथि।
सरकारक लेल पैघ चुनौती अपन देल गेल आश्वासनक पूर्ति करब अछि। वर्तमानक ओबीसी आरक्षणसँ छेड़छाड़ कयने बिना मराठा कोटा देब, ई एकटा कठिन काज अछि, जाहिमे विकल्प बहुत कम अछि।
